Aizawl FC-in chakin a tawp an khar

Mizo club Aizawl FC chuan tun season I League-a an match hnuhnung berah 3-1 in Sudeva Delhi an hneh a, relegation stage-a table chung ber luah chungin season an khar.

Sudeva hian goal an khung hmasa zawk - minute 17-na lekah midfielder Basit Ahmed Bhat chuan ṭha zetin Shubho Paul tan a siamsak a, kum 18 mi rawlthar beiseiawm hian hmahruaina goal ni turin a khung.

West Bengal rawlthar hian FC Bayern Munich Under-19 zingah pawh training a lo nei tawh a, ram 15 aṭanga Bayern-a training nei tur U19 player 15 thlan zingah a tel a ni - hmabak a nei êng hle.

Paul hian goal a khung hnuah chance a nei leh bawk a, mahse, AFC keeper Lalmuansanga chuan ṭha zetin a dansak - Sudeva lamin vawi tam an nawr hnuah Aizawl FC-in chance an nei ve a, mahse, Lalremsanga ball pek ṭha tak chu Dipanda Dicka chuan lo tauh mah se Sudeva keeper Sachin Jha a paltlang thei lo.

Aizawl an vanduai reng bik lo - first half hun pek belhah midfielder ṭhangduang Ayush Chhetri-a'n si phurh a sut a, second half-ah pawh AFC bawkin chance an nei zui. Mahse, Sudeva keeper Sachin Jha chuan Dicka leh Vanlalnghenga chance neih chu a dansak.

AFC an beidawng duh lo - Sudeva defender Nischal Chandan chuan minute 62-naah an lamah a tilut a, bench aṭanga luhtir Lalliansanga chuan minute 84-naah chak nemnghehna goal a khung zui.

Hun tawp thlengin goal dang a lut lo a, hun pek belh minute sarihnaah Sudeva captain Vanlalzuidika Chhakchhuak chu a yellow card pahnihna avangin hnawhchhuah a ni.

I League aṭangin team pakhat chiah an relegate a, Indian Arrows laka 1-0 a tlawm Kenkre an tla - Arrows tan Himanshu Jangra chuan minute 89-naah goal awmchhun a khung a, Kenkre an tla.

Hetihlai hian tla thei dinhmuna ding Real Kashmir chuan 1-1 in Trau an inhnehtawkpui a, Kenkre an tlawm bawk avangin an him.