Lampard thubuai an siamsak

Everton coach Frank Lampard a kam tam hret a, Liverpool nen an inkhelh ṭuma referee a sawiselna avangin English coach hi Football Association chuan thubuai a siamsak.

Liverpool laka 2-0 a an tlawm ṭum khan, Everton rawlthar duhawm Anthony Gordon chu penalty area-ah Joel Matip-a'n a titlu a, referee Stuart Attwell-a'n penalty a pe lo.

Lampard a insum zo lo a, Liverpool player ni ngat se penalty an hmuh a rin thu a sawi - hei hi FA chuan a ngaithiam lo a, match referee zahawmna tihbawrhbanna chi khatah an ngai tih an tarlang.

Everton attacking midfielder Gordon laka Matip-a foul nia a lan lai khan team pahnihin goal an la khung lo a, a hnu minute riatnaah Reds tan Andy Robertson chuan goal hmahruai khungin, Divock Origi chuan a belhchhah bawk.

Lampard chuan, "Penalty ngei a ni a, Anfield-ah erawh hlawh theih a ni lo. Mohamed Salah chu ni se, referee khan penalty a ham em em ang. Anthony laka Matip chet dan kha a foul ngei a ni," a ti.

Everton chuan Mer-seyside derby zawhah khan Professional Game Match Officials Limited (PGMOL) an bia a, Gordon laka foul ennawn a nih loh chhan an lo zawt tawh - Lampard hi Thawhṭanni thleng insawifiah tura hun pek a ni a, FA-in a insawifiahna an pawm loh chuan hremna an pe ang.