Lingard-a'n chhuah ngei a duh

Manchester United tana khelhna chang lo, club danga chhuah an phalsak bawk si loh Jesse Lingard chuan nipui bazarah chhuah ngei a duh. England midfielder hian khawi lam ngen a pan dawn tih erawh a la hriat loh thung.

Season hmasa khan Lingard hi West Ham-ah loan hmangin a chhuak, a khel chhe lo. Nipui bazar hun a inhawng a, a khelh phakna tur club zawm ngei a duh. Mahse, Man United lamin an chhuah phal lo a ni.

Ole Gunnar Solskjaer leh Ralf Rangnick te enkawlna hnuaiah hmun a chang leh chuang lo a, amah chelhtu club-in an tih dan hi lawm taka pawm a harsa ang tih chu a chiang, chhuah thuai a duh hi a mak hran lo.

Kum 29 mi midfielder hian club khelhna tur chu a hmu dawn, khawthlang media lamin an tarlan dan phei chuan - Newcastle United, AC Milan, Juventus leh Paris St-Germain ten an ngaihven nia sawi a ni.

Man United tana a contract neih lai hi June thlaah a tawp dawn a, a duh ber club chu man nei loin a zawm ang. Club lian leh player ṭha awmna zawm ngawt erawh a duh a rinawm lo, khelmual chhunga a luh tam theihna tur hmun a zawng ang.

May 3, Thawhlehni khan Man United hian Old Trafford-ah Brentford an mikhual a, 3-0 in hnehna an chang. Bench aṭangin Rangnick-a'n player pathum a dah lut a, an zingah Lingard a tel lo.

Premier League season kal laiah United hian khelh hmabak pahnih an la nei a, khualmualah ve ve a ni. Old Trafford-a an match hnuhnung bera Lingard an luhtir lo hi a unaupa chuan a hrethiam lo hle.

Lingard-a unaupa chuan, "Kum 20 chhung theihtawp a chhuahsak, hlawhtlinna a chanpuiin final-a goal khung pawh a nei. Mahse, Old Trafford-ah thlahna hun pawh an nei lo," tiin a sawi.