Chhetri-a'n lehkha a zir ṭha

India captain Sunil Chhetri-a'n inkhelh chawlhsan hnua a tih tur a ngaihtuah ṭan a, ISDE Law Business School-ah Master in sports management and legal skills zir turin a inziak lut - online hmangin zirna hi kalpui a ni thung.

Kum khat course zirna hi thla hmasa khan ṭan a ni tawh a, course fee hi euro 15000 (Cheng nuai 12.10) ni mah se Chhetri hian scholarship hmangin a zir dawn - ISDE hi football player inzawmkhawm pawl FIFPro nen an thawk dun a, Chhetri hi India rama footballer pawl Football Players Association of India-ah Vice President a ni.

India captain hian FPAI hruaitu a nihna kaltlangin scholarship hmangin lehkha hi a zir leh a ni. Chhetri hi kum 37 mi a ni ve tawh a, a boot a khai hnai ṭan tawh niin a lang.

Ram tan match 125-a goal 80 khung thei Chhetri hian season hman zawh takah khan Bengaluru FC tan league match 20 khelin goal li chiah a khung a, assist vawi khat a nei - a chuai ve ṭan ta niin a lang.

Tun hnaiah footballer-ten zirna an intihhmuh a, a bik takin European footballer zingah an career tawp lama zirna luhchilh an awm nual.

Goalkeeper ropui ṭhin, Bayern Munich chief executive officer ni ta Oliver Kahn hian inkhelh a chawlhsan hnuah MBA a zir ṭha leh a, December 2017 khan Manchester City captain hlui Vincent Kompany chuan Alliance Manchester Business School aṭangin MBA a zir chhuak a, Italy captain Giorgio Chiellini chuan April 2017 khan University of Turin aṭangin MBA a lo zo tawh bawk.

Indian footballer awm tawh zinga lar ber anga chhal ngam Bhaichung Bhutia pawhin inkhelh a chawlhsan hnuah sports management a zir ṭha leh a ni.