Watford-ah Hodgson a cham dawn lo

Premier League aṭanga tla thei dinhmuna ding mek, Watford boss Roy Hodgson chuan season tharah Watford a enkawl chhunzawm loh tur thu a sawi a, a chawlh ngei tawh a rinawm bawk.

Kum 74 mi coach hi Nilaini khan UK sorkar chuan Comman-der of the Most Excellent Order of the British Empire (CBE) pein a chawimawi a, British chawimawina ngaihhlut pathumna a ni.

Hodgson hi Buckingham Palace-ah CBE chawimawina hi pek a ni a, football khawvela a hnathawh avangin chawimawina hi hlan a ni. Kum 45 zet chu coaching khawvelah hun a hmang tawh a, chawimawina dawn hi a phu hle.

Hodgson hian club tam tak a lo enkawl tawh zingah Inter Milan, Blackburn Rovers, Fulham, Liverpool, West Brom leh Crystal Palace chu a langsar zual an ni a, ram team zingah England Switzerland, United Arab Emirates leh Finland a lo enkawl tawh bawk a, tawnhriat a nei ṭha hle.

Liverpool boss hlui chuan, "Thawhrim a ngai em em a, ka hna hi nuam ka ti a ni," a ti a, Swedish club Halmstads BK chu league-ah vawi hnih champion puiin, Malmö FF chu Swedish champion vawi hnih a nihpui a, Copenhagen tan Danish Superliga-ah a champion tawh bawk.

Hodgson-a'n a hming a chher bernaa chhal ngam erawh Fulham a ni a, English club vantlang ve tak hi 2009-10 season khan Europa League final a hruai thleng - LMA manager of the year-ah thlan a nih phah hial.

English coach hian season hmasa tawp ruala Palace a chhuahsan khan coaching a chawlhsan tawh tura ngaih a ni a, mahse, January-a Watford-in Claudio Ranieri an ban khan Watford enkawl turin a lo kir.

Hodgson chuan, "Watford zawm ka remtih khan hun rei lotê atan a ni sa a, chiang takin ka sawi lawk. Coaching ka chawlhsan tawh chu dah ṭhain, he hna thawk tur hian ka lo kir a, tunah chuan a hun a lo tawp dawn leh ta.

"Premier League football-a ka inhman chhunzawm zel ka ring tawh lo. Ka nupui leh fapa te nen hahdam taka hun hman ka phu ve tawhin ka hria a ni," a ti a, Hodgson hi kan hmu zui tawh dawn lo tak tak niin a lang ta.

Roy Hodgson enkawl Watford hi Premier League table-ah 19-na an ni mek a, Inrinni zan dar 7:30-a Crytsal Palace an lenchilh hunah an chak loh chuan Premier League aṭangin an tla chiang tawh ang.