Juve leh Sarri tan fiahna

Serie A chu Inrinni zan aṭang khan khelh chhunzawm leh a ni a, champion lai Juventus chu zanin dar 1:15 hian Bologna khelmualah an lenglut ang - Juve leh manager Maurizio Sarri tan fiahna a ni dawn.

Italian champion hi kar hmasa khan Coppa Italia final-ah Napoli ngam loin an tlawm, cup inelnaah hian semifinal match hnihah penalty vawi khat an khung bak goal an khung lo, final-ah pawh minute 90 chhung an khung lo.

Nomawi an chawi loh vangin Sarri nauten sawisel an hlawh a, an chak loh bakah tlarhma lam khelh dan chuan sawisel a hlawh. Cristiano Ronaldo leh Paulo Dybala awm mah se an hriam lo; striker Gonzalo Higuain erawh a dinhmun a chiang lo chhunzawm.

Turin club hian a zawna a vawi kua nan league nomawi chawi an tum a, hmahruaitu an ni mek bawk. Amaherawhchu pahnihna Lazio aia an sanna chu point khat chauh a ni, khelh hmabak an la neih tam avangin an dinhmun hi a nghing.

Juve hmachhawn tur Bologna pawh an dinhmun a ṭha bik lo. Table-a hmun laihawl luahtu hian coach Sinisa Mihajlovic contract an pawtsei hlim a, a chungah rinna an nghat ngam. Mahse, Mattia Bani, Federico Santander leh Jerdy Schouten te hrem an nih bakah Andreas Skov-Olsen chu hliam vangin a inlan thei dawn lo.