Barca leh Lionel Messi an chelh

Spanish La Liga boruak a 'hot' zel - Barcelona an chak zo lo! Champions League khelh tum Sevilla chuan an mikhual Barcelona lakah zahna an lantir duh lo a, Catalan club hi goal khung thei loin an lo dang chat. 

Barcelona hian La Liga khelh chhunzawm a nih hnuah match hnih khelin an chak ve ve a, inrintawkna sang tak nen Sevilla khelmual an pan. 

Mahse, Mallorca (4-0) leh Leganes (2-0) laka goal khung harsat lo team Barcelona-in goal an khung thei lo - point khatah an lungawi a ṭul a, Sevilla-in an duh an hmu. 

Nizan khan Real Madrid chuan khualmualah Real Sociedad an lenchilh a, hnehna an chan chuan Barcelona an nihrual ang - he thuziak i chhiar meuh chuan result a hriat

tawh ang. 

Barcelona thiampuipa Lionel Messi-a'n league khelh chhunzawm a nih hnuah goal hnih a khung leh der tawh a, Sevilla lakah pawh Argentine forward hian goal khungtu zingah a hming a nem kai leh ngei dawn niin a lang. 

Mahse, Messi vanneih zan a ni lo - first half-ah freekick hmangin goal khungna remchang nei mah se bar a tih per a, a career-a goal 700 khung tlin a tumna chu tih khawtlai a la ni rih. 

Messi hian a career chhung zawngin Barcelona leh Argentina tan inelna hrang hrangah goal 699 a khung tling tawh a, goal 700-na hi Sevilla lakah khung ngei a tum. Mahse, a hlawhtling thei ta rih lo. 

Sevilla hian Messi hi 'thawkna tur pawh pe lo ang' ti ang maiin an hual hneh a, an tumah an chiang - Messi dan chah hi Barca dan chahna remchang a ni a, inkhel boruak 'hot' takah Sevilla an hlawhtling. 

Mualneitu Sevilla-in defensive game an khel ngei a, ball pawh an chang tlem zawk. Mahse, goal hmaa an chance neih thlir chuan Barcelona aia an vanduai zawk thu sawi ni ila, sawi sual kan ni lo ang. 

Tun season La Liga-a 'hot' ber pawl Lucas Ocampos chu Barca tlarhnung tan buaipui tham a ni a, Argentine striker hian bar a tih per bakah Barca keeper Marc-Andre ter Stegen chuan vawi khat ṭha zetin a dansak bawk. 

Ter Stegen hian Barcelona aṭanga inzir chhuak Munir El Haddadi chance neih a dansak bawk a, Real Madrid aṭanga loan-a Sevilla pantu defender Sergio Reguilon chuan vengtu nei lo chungin chance nei mah se Ter Stegen zawnah tak a pet - uiawm tak a ni. 

Barcelona-in danglamna a thlen beiseiin Antoine Griezmann chu minute 76-naah luhtir bawk mah se French forward hian danglamna a thlen thei lo a, chance duhawm vawi khat neitu Luis Suarez pawhin goal net a zawng hmu zo bik lo. 

Sevilla-in goal khung loin Barca an chelh ding a, Catalan club laka chak kher tum loh chu thil finthlak a ni tih coach Julen Lopetegui-a'n a hre chiang - Real Madrid boss hlui hi fak tlak a ni. 

Lopetegui hian 4-3-3 formation rawn hmang mah se tlarhnungah player panga an din chang a tam a, goal chhuah loh an tum - Barca game innghahna chu Messi a ni tih an hrechiang a, hmun awl pek miah loh an tum bawk. 

Spanish coach hian midfield-ah player ṭha pathum Fernando, Oliver Torres leh Joan Jordán a nei tih a hrechiang a, player pathum hi Sevilla game siamtu niin khelmual lai aṭanga Barca game siam tur chu an dang chat hneh hle. 

Tlarhnung laia ding Jules Koundé kha kum 21 chauh a la ni a, Messi leh Suarez a dan hneh dan thlir chuan French defender hian hmabak a nei êng hle - a ṭul huna tlarhnung pui tura tlan let Fernando bawk sawi nawn a ngai a, Manchester City midfielder hlui hi Barca ṭantu tana ngeiawm khawpin a khel ṭha a, a thawkrim.