Aizawl FC chhandam nan Al Amna

Minerva Punjab coach Surinder Singh-a'n, "Aizawl-ah point thum hmu turin kan lo kal," tiin inkhelh hmain sawi mah se, point thum hlawh chhuaktu chu Aizawl FC zawk an ni.

Mizo club hian nimin khan RG Stadium, Mualpuiah I League club thar Minerva Punjab chu 1-0 a hnehin kutbengin an hawtir.

Aizawl FC tana chhandamtu chu Mahmoud Al Amna a ni a, Syria international hlui hian Mizo club jersey sen ha chunga a hmel a lan hmasak berah goal a hlawh chhuak nghal.

Minute 90 chhung team pahnihin goal an khung loh hnuah MPL club-in injury time-ah corner an hlawh chhuak a, kum 33-a upa midfielder hian a thiamthil 'show' nana hmangin corner ṭha bik a pet a, player buai nuai karah Loveday Enyinnaya chuan an lamah a tilut.

Mumbai FC coach hlui Khalid Jamil kaihhruaina hnuaiah Aizawl FC-in match hnih khelin point li an nei tawh a, Minerva Punjab-in point khat bak an la nei lo thung.

Vanduai Aizawl
RG Stadium, Mualpuiah Aizawl FC ṭanturin mipui ṭhahnem tak an pungkhawm a, an beisei goal hmu tur erawhin an nghah rei a ngai hle.

Inkhel ṭantir lamah Al Amna leh Alfred Jaryan ten Minerva goalkeeper Ravi Kumar 'enchhinna' an ngei nghal a, Sporting Goa keeper hlui tan buaina a tling lo.

Aizawl FC hian a tir lamah inkhel an thunun a, mikhual team-in an goal venhim hna pui bera an neih avangin Mizo club-in hmun âwl (space) erawh an nei tlem a, Minerva goal bulah an defender pali leh defensive midfielder pahnih an ding reng a ni ber mai.

Aizawl FC tan Jayash Rane chuan Uttar Pradesh keeper chauh a hmachhawn hnuah 'chip' goal a tum a, Ravi Kumar a pet khum hnuah ball-in 'bar' a per. Aizawl FC-in nawr chhunzawm viau

ṭhin mah se tlarhma lama maltlat Kamo Stephane Bayi a hriam tawk lo a, tlar hmaah ball awmze nei an inpe thei lo a, Minerva tan AIFF Academy chhuak Kamalpreet Singh chu mual ding sir lama Albert Zohmingmawia dah ṭhatu a ni.

Beidawng duh lo
Aizawl FC coach Khalid Jamil chuan, "Ka naute khan a tawp thlengin beidawng duh loin an bei a, a tawpah an beidawn duh loh rah kan hmu a ni. Ka player-te kha an vaiin an khel ṭha em em vek a, fak bik tur pawh an awm lo," tiin point thum an hmuh chu an vai thawhrim rah a nih thu a sawi.

Kum 39 leka upa ni chunga tawnhriat ngah tak coach chuan sawi chhunzawmin, "Fan-te kha an tam em em a, kan khelh leh zel turah pawh min ṭawiawmna kan mamawh dawn a ni," a ti a, a player thar Al Amna chu engmah hrilh ngai lo khawpa 'player thiam bik' a nih thu a sawi bawk.

Vanduai inti Surinder
Minerva Punjab coach Surinder Singh chuan, "Injury time-ah goal kan chhuah a, kan vanduai a ni. Theihtawp chhuahin kan khel a, point kan hlawh chhuak lo hi chu kan vanduai takzet. Mahse, hei hi game-in a ken tel ve reng a ni. Kan goalkeeper Ravi Kumar khan vawi tam min chhanhim a, a inhliam hnuah goal kan chhuah a ni," tiin an keeper inhliam vanga chak loah a inngai.

Delhi Dynamos keeper hlui Ravi Kumar hi minute 77-naah AFC striker Kamo nen chiah an inhmachhawn hnuah tlan chhuakin a kutin ball a beng thla a, a inhliam zui. Kum 23-a upa keeper hi red card pek tur niin lang mah se yellow card chiah pek a ni a, a vannei hle. AFC coach Khalid chuan hemi chungchang hi sawiin, "Red card tur niin ka hria a, mah se referee kha kei aia dan hre zawk turah ka ngai," tiin inkhel thununtu a sawisel duh lo.

Inkhel thlirna
Aizaw FC thar an ni tawh. Game a hmuhnawm sawt lo tih chiang mah se, result an nei. An khelh danah lungawi lohna tur tam mah se, khelh hniha point li hi result ṭha a ni.

Spanish coach Manuel Ratemero hnuaiah khan vawi 300 bawr vel ball an in-pass kual ṭhin a, an hmuhnawm - Khalid-a hnuaiah chuan ball an in-pass tlem. An goal venhim an ngai pawimawh hmasa a, long ball a tam a, a hmuhnawm lem lo a; amaherawhchu result a keng tel.

Mizo mipui hmuh duh passing mawi leh attacking mar ṭha tak an la nei lo a, winger an chhawr ṭangkai lo. Midfielder erawh an thiam a, Alfred an pawt let a, Amna a awm bawk a, team khawng tak chu an ni tawh - tlar hma erawh a la bil hle - minute 180-ah goal an la khung lo - Aizawl FC goal pahnih hi own goal ve ve a ni.

Aizawl FC hian goal nawr turin awmze neia ball lakluh an la nei mang lo a, ball kâng vawrh luh luah luah a la tam a, an striker-te'n an khingpui an chhaih buai hleithei lo. Season a kal zel ang a, an tlarhma an inman deuh hunah erawh an hlauhawm sawt ang.

Mipuiin an puih ṭhat chuan Aizawl FC hian player ṭha chu an nei tawh, result ṭha nei zel thei turin mipui an pawimawh ang.