Mayweather-a'n McGregor a cho

Weight divsion pangaa boxing world champion Floyd Mayweather chuan amah chotu UFC champion Conor McGregor chu dollar maktaduai 15 hlawha amah hnek turin a cho!

American boxer Mayweather hi kum 2015 khan boxing khawvelah hneh loh tawng loin a chawl a, tun hnaiah ESPN-in an kawmnaah boxing ring chhunga kir leh tura amah thlem thlu thei awmchhun chu McGregor chiah a nih thu a sawi.

Kum 39-a upa boxer chuan, "Kei chu sumdawng mi ka ni a, sumdawnna aṭanga thlir chuan McGregor nena inhnek hian awmze thui tak a nei a ni," tiin sumin a nunah nghawng thui tak a neih thu a pha lo a, McGregor hian Mayweather a hnek dawn chuan dollar maktaduai 100 hlawh a duh thu a lo sawi tawh thung.

September 2015-a Andre Berto a hneh hnua inkhelh chawlhsantu chuan McGregor-a aiawhte nena an inbiak mek thu sawi nghalin, "Conor McGregor nena kan inhnek ngei theih nan hmalakna kalpui mek a ni a, ka number zat chu an hria. Ka number chu dollar maktaduai 100-a a ni," tiin a indah sang hle.

American boxer chuan sawi chhunzawmin, "McGregor hi dollar maktaduai 15 pek ve kan remti a, hemi zawhah hian pay-per-view kaltlanga a hlawkna kan insem turte chu kan la sawi leh thei ang," a ti.

McGregor hi November 2016 khan UFC division hniha champion hmasa ber a ni a, Mayweather hi mixed martial arts dan leh hrai hnuaia inhnekpuiah a lo cho tawh bawk. Kum 28-a upa fighter hian California State Athletic Commission hnuaiah boxing licence a nei a, hetihrual hian UFC contract hnuaia awm a nih avangin Mayweather hmachhawn tur chuan UFC phalna a hmuh tel a ngai a ni.