Arsenal player an rinawm
Olivier Giroud, Laurent Koscielny leh Francis Coquelin te chuan Premier League table-a pangana Arsenal tana an rinawm zia lantir nan contract an pawt sei.
Gunners defender Koscielny hian kum 2020 thleng cham turin contract a ziak. France international hian kum 2010 khan North London club hi zawmin player ṭangkai a ni nghal a, match 273 a khelh aṭangin goal 22 a khung tawh.
Striker Giroud leh midfielder Coquelin te cham chen tur erawh tarlan a ni lo. French trio te hi Arsenal tana player pawimawh an ni phak vek. Olivier hian season hmasa khan inelna hrang hrangah goal 24 khungin tun hnaia a match hnuhnung paliah goal li khungin Gunners hmatawng hriam bera a ni mek. Midfielder Coquelin pawh season hmasa ṭang khan rinrawl zingah telin a club tan hian match 131 a khel tawh.
Arsenal manager Arsene Wenger chuan, "Kan player pawimawh pathum ten contract an pawt sei thei hi kan lawm hle. Francis hian tun hnaiah hma a sawn nasain hma thlir a nei ṭha. Olivier hian min zawm tirh ai khan tawnhriat a ngahin player ṭha zawk a ni tawh a, Laurent hi chu kan team hotupa niin kan player ṭha berte zinga mi a ni bawk," tiin a naute chungchang a sawi.
Gunners hian kum 2017-ah league match vawi hnih an khel tawh a, Crystal Palace goal hnih faia an hneh hnuah Bournemouth nen 3-3 in an inhnehtawk - zanin dar 8:30 hian Swansea City an lenchilh ang.