Chawimawina dawng tur Steven Gerrard

Liverpool captain hlui Steven Gerrard chu Liverpool khawpuiin civil mi chawimawina an neih san ber Freedom of the City of Liverpool chawimawina dawng tura hming chhawp chhuah zingah a tel. England captain hlui ni bawk hi national leh international huapa football tana a thawhhlawk piah lamah midangte ṭanpui kawnga a inhman nasat avangin he chawimawina dawng tur hian Liverpool khaw Mayor chuan a rawt a ni.

January 18 hian Liverpool khawpuia councillor te chuan an khawpui chawi­mawina sang dawng tura hming chhawp chhuahte hi a pawmna hun an nei leh phawt ang a, kumin kum tawp lamah chawimawina hlan hun hi chu neih a ni chauh ang. Captain Fantastic chuan, "Chawimawina dawng tur zingah ka hming a tel tih ka hriat khan mak ka ti lutuk a, lawmnain ka khatliam a ni ber mai," tiin a chawimawina dawn tur chungchang a sawi.

Liverpool tana vawi 710 inlan tawh Gerrard chuan sawi chhunzawmin, "Liverpool hi ka chawr chhuahna khawpui a ni a, min chawiliantu ka khua ngeiin hetiang taka chawimawina ropui min pe tur hi sawi tur pawh ka hre lo hial zawk a ni. Hetiang ang chawimawina ropui meuh dawng tur chuan ka insit a, ka hming chhawpchhuah a nih avang erawh chuan ka inchhuang em em thung si," a ti.

Mayor Joe Anderson chuan, "Reds i ni emaw Blues i ni emaw sawi a ngai lo a, Stevie hi he khawpui tana palai hna thawktu ropui tak a ni tih hi kan pawm vek a ni," tiin Liverpool leh Everton fan-te pawn khelmual chhunga an inhuatna dah ṭhain an khaw footballer chhuanvawr chu an ngaihsan vek thu a sawi.