Sawi mawi chawp ngai loa hmuhnawm tur Manchester United Vs Liverpool

Pathianni zan dar 9:30 hian Old Trafford-ah Manchester United-in an hmelma kumhlun Liverpool an mikhual dawn a, football match tam tak hi chu sawi mawi chawp hnua ngaihven hlawh a ni a, English club lian pahnih inkhel tur erawh fak hranpa a ngai tawh lo.

Wayne Rooney-a'n United tan goal 249 a khung tawh a, Red Devils legend Sir Bobby Charlton nen an intluk mek. Everton club-a bul ṭan Rooney hian a naupan lai aṭanga a huat tawh Liverpool lama goal a khung a nih chuan a record hlutna belhchhahin a awm ang.

Mou a dawizep

Liverpool-in Jurgen Klopp-a hnuaiah attacking game an khel a, league bikah goal 48 khung tawhin tun season-a goal bawhna ber an ni. Manchester United manager Jose Mourinho-a'n Reds ṭhat zia a hrechiang a, October 18-a Anfield an tlawh ṭumin goal venhim hna a thawk a, vannei takin point khat an hlawh chhuak.

Portuguese manager Mourinho a dawihzep a tih theih a, amaherawhchu Premier League-ah Klopp-a naute hian Anfield-ah hneh loh an la tawng lo. Reds hian an mualah Manchester City an hneh thei a, EFL Cup-ah Tottenham Hotspurs an hneh bawk a, league bika vawi hnih an chak loh hi khualmuala thleng a nih avangin Mourinho thutlukna hi dem theih a ni lo - Anfield-ah Liverpool hi club ṭha bik an ni tlat.

Old Trafford-ah

League-a club pahnih inhmachhawn tawhnaah Manchester United-in record an nei ṭha zawk a, vawi 167 an inkhelh tawhah United-in vawi 67 hnehna an chang a, Reds hi vawi 55 chak ve bawkin vawi 45-ah chak zawk an awm lo.

Old Trafford-ah United record a

ṭha lehzual a, vawi 84 an inkhelh tawhah mualneitu hian vawi 42 hnehna chang theiin, vawi 25 an inhnehtawk a, Liverpool chak zat chu vawi 16 a ni. Premier League hming a put hnuah United hian Old Trafford-ah vawi 24 Reds hi an mikhual tawh a, vawi 15 zet an hneh bawk.

United vul, Reds chuai?

Manchester United hian inelna hrang hrangah a zawnin vawi kua hnehna an chang tawh a, Premier League bikah a zawnin vawi ruk hnehna an chang. Jose Mourinho hoten an match hnuhnung berah Hull City 2-0 in an hneh a, EFL Cup final lut turin an dinhmun a ṭha hle. Amaherawhchu Portuguese manager hian Liverpool hneh tur chuan amah bakah player leh mipui thlenga hmasawn an mamawh thu a sawi lang.

Liverpool erawh league match hnuhnung bera Sunderland an draw hnuin FA Cup-ah Plymouth nen an inhnehtawk leh a, EFL Cup semifinal first leg-ah Southampton lakah 1-0 in an chak lo bawk. Reds hian United zawh hian Plymouth (Jany 18), Swansea City (Jan 21) leh Saints (Jan 26) te an hmachhawn leh nghal dawn a, ni 15 chhungin match nga khelh tur an nei a, an hmabak a hautak hle.

Kum 2017-ah Mourinho naute an vul a, Klopp-a naute an chuai deuh niin lang mah se league table thlir chuan United hian Reds hi point ngain an la pha chuang lo.

Ibra leh Hendo an dam

Manchester United-in damlohna vanga Zlatan Ibrahimovic an chhawr theih loh hnuah Swede striker a inlan leh thei tawh dawn a, Liverpool lam tan captain Jordan Henderson a khel tawh bawk ang. Inkhel pawimawha player hming langsar an damṭhat hian inkhel hmuhnawmna belhchhahin a awm ṭhin.

Reds hian defender Joel Matip an chhawr theih tawh an beisei bawk a, Cameroon defender hi a inlan thei a nih ngat chuan tun hnaia Liverpool buaina tlarhnung a phui sawt ang. Tlarhma lamah Africa Cup of Nations khelh vangin club top scorer Sadio Sane chhawr thei lo mah se Philippe Coutinho a dam leh tawh - Brazilian playmaker hian United tlarhnung mangchhia rawn thlen a tum dawn a ni.

United lamin Africa Cup of Nations khela zin Ivorian Eric Bailly tel loin an khelh a ṭul a, Argentine defender Marcos Rojo dinhmun a la chiang lo bawk.

Eng nge an sawi?

Manchester United manager Jose Mourinho chuan, "Pathianni hi team tan leh supporter tan inkhel pawimawh a ni a, ka sawmna chu inkhel turin Old Trafford rawn pan suh u, inkhel turin rawn kal ula, Liverpool hi min hmachhawn pui rawh u," tiin anmahni ṭantute a chawk phur.

Liverpool manager Jurgen Klopp chuan, "Hun rei lote a khelh chhungin kan tana Coutinho pawimawh zia kan hre nghal a, inkhel theia a rawn kir hi kan tan chuan thu lawmawm a ni. Saints kan hneh loh ṭumin thil tam tak tihsual kan nei a, amaherawhchu kan tho chhuak leh thei ang," tiin Old Trafford an lenluh hma ngeia insiamṭhat an mamawh thu a sawi.

Inkhel dang

Premier League champion Leicester City-in hmahruai mektu Chelsea an mikhual dawn a, season liam ta kharnaa an inhmachhawn ṭum nen chuan a inang tawh lo ang. Blues midfielder N'Golo Kante chuan khawvel hriata a larchhuahna hmun King Power Stadium a vawi khat nan a tlawh dawn.

Foxes manager Claudio Ranieri chuan, "Kante ṭha taka dawng sawng turin mipuite ka ngen a, kan champion ṭuma kan player a ni tih kan hriat reng a ṭha. Chelsea hian Conte hnuaiah bul ṭan ṭha tawk lo mah se tuna an awmna thlirin zah an phu a, chutihrualin hneh tumin kan lo khel ang," tiin a sawi.

Everton-in United aṭangin Morgan Schneiderlin an lalut a, French midfielder hian Southampton-a amah enkawl tawhtu Ronald Koeman-a hnuaiah a career siam ṭhat a tum leh dawn. Toffees hian an mualah Pathianni khian Manchester City an mikhual dawn a, hmabak a harsa nghal dawn.

Kum 27-a upa Schneiderlin hian pound maktaduai 25-in July 2015 khan United a zawm a, match 47 a inlan hman. Jose Mourinho hnuaiah khelhna hmun a chan meuh loh avangin Everton-in pound maktaduai 20 in an lei chhuak a, French midfielder man hi pound maktaduai 24 thlenga sang chho thei a ni.

Zanin Inkhel Tur

Tottenham 6:00 PM West Brom

Burnley 8:30 PM Southampton

Hull City 8:30 PM Bournemouth

Sunderland 8:30 PM Stoke City

Swansea City 8:30 PM Arsenal

Watford 8:30 PM Middlesbrough

West Ham 8:30 PM Crystal Palace

Leicester City 11:00 PM Chelsea

January 15, Pathianni

Everton 7:00 PM Manchester City

Man United 9:30 PM Liverpool