England manager hlui Graham Taylor a thi

England manager hlui Graham Taylor chu Ningani khan lung­phuchawlin a thi a, kum 72-a upa a ni. Taylor hian manager a nih laiin Watford chu season ruk chhungin fourth division aṭanga first division a inhlankaipui a, a hun laia league sang berah hian pahnihna dinhmun hial hauhin 1984 FA Cup-ah khan final a luhpui hial a ni.

BBC Sport-a pundit hriat hlawh tak ni zui Taylor hian Watford bakah hian Aston Villa leh Wolves a enkawl bawk a, kum 1990 khan England manager hna chelh ṭanin kum 1994 World Cup khel tura a hruai thlen zawh loh avangin kum 1993 khan England enkawl hna hi a bansan.

Taylor-a chhungte chuan, "Vawiinah hian lunghnur takin Graham chu a mut hmunah a hahchawlh tak thu hi kan puang a, kan chhungkua chu kan beisei loh chhiatna avang hian kan hamhaihin min ṭhawng na em em a ni," tiin thuchhuah an siam.

Zanin dar 8:30-a Middlesbrough mikhual tur Watford chuan Boro an mikhual hunah hian an manager hlui thlah nan minute khat chhung a ruala kut ben an tum a, English Football League chuan tun kar league match inkhel tur zawng zawngah minute khat chhung kut ben hun hi Graham thlah nan hman a nih tur thu an puang bawk. Club ṭhenkhatin an duh chuan armband dum an hreng thei bawk ang.

Aston Villa chuan Graham thihna avanga an hnual thu leh an manager hlui chu an hriatreng tur thu an sawi a, Graham-a hnuaia England tana a match hmasa ber kheltu Alan Shearer chuan, "Kawng min kawhhmuh a, thil ropui tak min tihsak avangin ka theihnghilh tawh lo ang," tiin a pu hlui hi a thlah.

Manchester United manager hlui Sir Alex Ferguson chuan Graham chu mi dik leh rinawm, engtiklai pawha midang puih inhuam reng a nih thu a sawi a, Football Association chairman Greg Clarke chuan foot­ball khawvela pa zah kai takin khawvel a mangṭha thu leh an hriatreng tur thu a sawi ve ve bawk.

Graham Taylor sulhnu
Lincoln City (1972-77) - Lincoln a enkawl hian kum 27 chauha upa la niin FA hnuaia coach ni thei naupang ber a ni a, kum 1976 khan fourth division-ah a champion pui.
Watford (1977-1987) - Kum nga chhungin fourth division aṭangin first Division a inhlankaipui (W244, D124, L159)
Aston Villa (1987-1990) - Second division-a relegate hlim Villa a enkawl a, a season khatnaah kaisanpui lehnghalin a season thum­naah Liverpool tluk loin first division-ah pahnihna an ni.
England (1990-1993) - Euro 92 group stage an paltlang zo lo a, World Cup 1994 an inpetkai lo bawk (W18, D13, L7)
Wolves (1994-1995) - Sea-son khat a enkawl hnuah banna a thehlut. (W37, D27, L24)
Watford (1996-2001) - Division Two nomawi chu kum 1998 khan a chawipui a, Division One play-off final chu 1999 khan an khel bawk. (W104, D80, L91)
Aston Villa (2002-2003) - Premier League-ah 16-na a nihpui a, coaching a chawlhsan zui (W19, D14, L27)