Payet-a'n Hammers tan khelh a duh lo - Bilic

West Ham United manager Slaven Bilic chuan a player pawi­mawh Dimitri Payet chuan club tana khelh a duh tawh loh thu a sawi a, hetihrual hian French midfielder chu hralh tumna a neih loh thu a sawi lang nghal bawk. Kum 29-a upa midfielder hi nipui transfer aṭang tawh khan Hammers chhuahsan tur anga sawi thawm a awm tawh.

Bilic chuan, "Kan player ṭha ber hi hralh kan duh loh thu kan sawi chiang tawh a, mah se Payet min chhanna chu he club tana khelh a duh tawh loh thu a ni. Hralh tumna erawh kan la nei chuang lo, " tiin June 2015-a Marseille aṭanga pound maktaduai 10.7-a an lakluh midfielder chungchang a sawi.

Payet hian season hmasa khan Hammers tan league match-ah goal 12 a khung a, PFA Players' Player of the Year award dawng thei tura hming chhawpchhuah zingah tel phak hialin February 2016 khan kum 2021 nipui thleng London club-a cham tur hian contract thar a ziak.

Mahse, France international hian tun season-ah goal nga a khung tawh chungin beisei a phak lo a, khaw­thlang media te chuan Bilic hian a player hi a rilru put hmang thlak danglam turin a hrilh niin an tarlang.

Bilic chuan, "Rilru puthmang dik leh inpekna ṭha tak he team-in a hnena an lantir anga lantir let ve turin ka beisei a ni. Engpawh thleng se, Payet hi hralh tumna erawh kan nei lo a, a chhan pawh sum leh thil dang vang ni loin kan player ṭha ber hi kawl rih kan la duh vang a ni mai. Club chairman nen pawh kan sawi dun tawh a, contract rei zawk kan lo pek tawh chhan pawh kha kan hnena cham rei tura kan duh vang a ni," a ti.

French midfielder hi Manchester City laka FA Cup-a 5-0 an tlawm ṭumin bench-ah dah a ni a, Bilic chuan, "Club ṭhenkhatin lakluh an duh ngei a, hei erawh thil thleng pangngai ve reng a ni. Mahse, a rilru puthmang a thlak hma chu he team tan hian a inlan lo ang a, kan training-naah pawh a tel lo ang," tiin a player ṭha chu chelh tum mah se a inkhelh kher loh tur thu a sawi.

Hammers hian zanin dar 8:30-ah tlak hlauhawm dinhmuna ding mek Crystal Palace an mikhual ang.