La Liga - A sang pahnih inkhel Sevilla Vs Real Madrid

Real Madrid-in Pathianni zan dar 1:15-ah Sevilla hmachhawn turin Ramon Sanchez Pizjuan an tlawh dawn a, Ningani zan inkhel boruak avangin inkhel a nung sawt ang.

Copa del Rey last 16 second leg-ah Real leh Sevilla te hi Ramon Sanchez Pizjuan-ah 3-3 in an inhnehtawk a, first leg-ah Zinedine Zidane hote hi 3-0 a an chak tawh avangin quarterfinal an lut tho. La Liga-ah Real hi hmahruaitu an ni a, Sevilla hi pahnihna niin an inkhel leh tur hian ngaihven a hlawh ang.

Boruak a sang

Ningani zan inkhelah Zinedine Zidane-a'n BBC - Karim Benzema, Gareth Bale leh Cristiano Ronaldo aiah Marco Asensio, Alvaro Morata leh rawlthar duhawm Mariano te inkhel bul a ṭantir a, amaherawhchu French manager ngaih ang ngawtin a awlsam lo.

Sevilla-in Danilo own goal vangin hma an hruai a, Real lamin Marco Asensio hmangin sut mah se Stefan Jovetic leh Vicente Iborra te hmangin mualneituin hma an hruai nawn. Minute 13 khelh tur a la awm avangin Real ṭantute thin phu a rang a, mah se minute 83-naah Matias Kranevitter-a'n ṭul lo takin penalty a chawi. Real tan Sevilla aṭanga inzir chhuak Sergio Ramos a rawn pen chhuak a, goal laiah a chip keuh (Panenka Kick) a, mualneitu ṭantute lamin an ngai thiam lo hle. Sevilla ṭantuten an star hlui Ramos hi an au el a, hei vang hian boruak a sang.

Real Madrid-in goal an duh avanga an luhtir Karim Benzema-a'n injury time-ah goal a khung zui a, 3-3 in an inhnehtawk. Sevilla-in chak an phu zawk a, Real huaisenna erawh hmuh hmaih theih a ni lo. Zinedine Zidane chuan, "Sergio Ramos khan an au el kha a hre thiam lo a, kei pawhin an player hlui laka an chet duh dan kha ka hrethiam bik lo," tiin a player a chhan.

French manager hian Ramos chhan mah se Sevilla ṭantu ruhkawl erawhin an ngaihdan an sawh sawn lo ang. Pathianni zanah Ramos-a'n auh elna a tawh leh ngei rin a ni a, inkhel boruak sangah Sevilla hmabak erawh a hautak sawt dawn, a chhan chu Real tan Cristiano Ronaldo a inlan tawh ang.

Record thar

Real Madrid-in match 40 chhung hneh loh an tawng tawh lo a, nikum April thlaa Champions League quarterfinal first leg-a Wolfsburg an hneh loh hnuah hneh loh an tawng tawh miah lo tihna a ni. Zidane-a hote hian an hmelma Barcelona-in kum 2015 leh 2016 chhunga hneh loh nei loa match 39 an kal zawn tawh chu an lehpel chiah a ni.

MSN an vul nawn dawn?

Champion lai Barcelona chuan zanin dar 8:45 hian Las Palmas an mikhual ang. Catalan club hian an match hnuhnung berah Athletic Bilbao 3-1 in an hneh a, inkhelh banah manager Luis Enrique chuan league lamah result ṭha an neih zui a beisei thu a sawi.

Barca hian kuminah beisei an phak rih lo. League match 17 an khelh tawh aṭangin an khingpuite nen vawi nga ngawt an inhnehtawk tawh a, ṭum hnih an chak lo thung - an hmelma Real Madrid laka nomawi hloh an duh lo a nih chuan chetsual a thiang tawh lo.

Tun dinhmunah Barcelona hian chanchin lawmawm an nei. Tlarhma lamah Lionel Messi, Luis Suarez leh Neymar (MSN) an vul leh tawh.

Brazil captain Neymar chuan nikum October 19 hnua a vawi khat nan goal a khung leh tawh a, Uruguay international striker Suarez chuan Barcelona tan match 120 a khelh aṭangin goal 100 a khung tling der tawh. Anni pahnih ai maha tawrhhlelhawm chu a zawna match thum chhung free kick pet lut tawh Messi a ni - MSN hi Las Palmas tan ven uluk an ngai hle ang.