Zaninah champion lai Bengaluru
Bengaluru FC-in an match hmasa berah Shillong Lajong 3-0 in an sawp a, zanin dar 7:00 hian I League club thar Chennai City an mikhual leh ang - inkhel hi Ten 2 chuan live-in a pe chhuak ang.
Bangalore club tan goalkeeper Lalthuammawia Ralte leh defender Lalchhuanmawia Fanai te chu hliam vanga an inlan theih a beiseiawm loh a, Lajong an sawp ṭuma goal ropui khungtu North Mualcheng tlangval Sena chu inkhel bul ṭan leh tura beisei a ni.
Barcelona assistant manager hlui Albert Roca enkawl team hian Kerala Blasters defender Sandesh Jhingan an lalut a, Lajong an hmachhawn lai ai khan an ṭha tawh zawk dawn tihna a ni. Chennai City-in an match hmasa berah Lalnunmawia an chhawr chungin Minerva Punjab lakah goal khung loin an inhnehtawk pui a, zaninah goal khung turin MPL best player Malsawmfela an luhtir a nih pawn a mak lo ang.
East Bengal ṭha zawk
Kolkata club lian East Bengal-in I League season tawp ber tura ngaihah champion ngei tum mah se an match hmasa berah mikhual Aizawl FC an inhnehtawkpui. East Bengal-in tlarhmaah player chak ṭha an mamawh tih hriain Robin Singh an lalut a, India international striker hi ṭhatpui tham a ni.
Aizawl FC hmachhawn lotu Lalrindika Ralte-in DSK Shivajians a hmachhawn tur thu Vanglaini palai a hrilh a, David Lalrinmuana chu squad-ah telh niin Robert Lalthlamuana erawh a zin ve lo. DSK Shivajians lamah Lallianzuala Chhangte leh Jerry Mawihmingthanga te chu an player pawimawh zinga mi an ni a, an match hmasa bera Mumbai FC ngam lotu team hian an khelmualah point hlawh chhuah ngei an tum ang.
Chhawnkima telna Mumbai
Pathianni tlai dar 4:30-ah Churchill Brothers-in Mumbai FC an mikhual dawn a, team intiat tawk pahnih inhmachhawn tur hi Ten 2-ah live-a pek chhuah a ni ang.
Mumbai FC coach Santosh Kashyap-a'n season ṭan hmain pathumna tal nih an tum thu a sawi a, a thusawi nemngheh nan an match hmasa berah DSK an hneh nghal. AFC pro licence nei coach hian Royal Wahingdoh lama a lo hman thiam tawh Lalchhawnkima a lalut a, Champhai tlangval hian an match hmasa berah minute 90 chhung khel nghalin zaninah pawh inlan tura beisei a ni.
Churchill hian an match hmasa bera Mohun Bagan an ngam loh hnuah Kyrgyzstan midfielder Bektur Talgat leh Mali striker A Kroma te an nei leh tawh a, Bagan hmachhawn team aia ṭha zawk nichungin Mumbai an mikhual ang.
Zanin Inkhel Tur
7:00 PM Bengaluru FC Vs Chennai City FC
7:00 PM DSK Shivajians Vs East Bengal
January 14, Pathianni
4:30 PM Churchill Brothers Vs Mumbai FC