Liverpool tan nomawi: Spurs tan Champions League?
Premier League-ah Liverpool-in champion an la beisei ve reng a, point khatin hmahruaitu Manchester City an phak lo mek thung - match li chiah khelh tur a awm tawh.
Reds-in nomawi an beisei laiin Spurs beisei erawh season thara Champions League khelh a ni a, table-ah pangana an ni mek thung - palina Arsenal an phak lohna chu point hnih a ni.
Liverpool leh Spurs-in tum an nei ve ve a, an tum inthlau deuh mah se club pahnih tana an tum hlutna erawh a danglam lo - chetsual a thiang tawh lo ve ve a, zanin dar 12:15-ah an intawng dawn.
Hetihlai hian Premier League hmahruaitu Manchester City chu Pathianni zan dar 9:00-ah an inlan dawn bawk a, Champions League semifinal-a chak lo hlim team hian Newcastle United an mikhual ang.
Liverpool an chau
Season duhawm tak hmangtu Reds-in tun season inelna an telnaa match khelh tur zat zawng zawng an khel vek dawn a, quadruple champion nih an beisei mek - chumiin a ken tel chu 'chauh' a ni.
Liverpool hi Champions League semifinal khela Spain-a zin zo hlim an ni a, an chau ang tih chu thil chiangsa a ni. Hetiang boruak karah hian Spurs hneh tur team engtin nge an rem ang, tih chu zawhna awm mek a ni a, chhan a harsa.
Roberto Firmino-a'n dam lam pan tawh mah se bul a ṭan theih a la beiseiawm loh a, chuti a nih chuan Villarreal laka inkhel chau Mohamed Salah leh Sadio Mane-ah a tu emaw zawk tal chu an luh a ngai tihna a ni a, Digo Jota leh Luis Diaz an la awm bawk.
Hetihlai hian tlarhnung laiah CL bika chhawr ngun deuh Ibrahima Konate chu dah chhuah a nih rin a ni a, a aiah Joel Matip a lut ang - Trent Alexander-Arnold aia Joe Gomez a lut a nih pawhin a mak lo ang.
Boruak a ṭha
Liverpool fans tana thu hriat nuam tak tur chu an boruak ṭha em em hi a ni - League Cup-ah an champion tawh a, FA Cup leh Champions League final an lut tawh a, league-ah point khat chauhin an hnufual bawk.
Tun hnaiah player chhuanvawr Salah chu Football Writers' Association's Footballer of the Year-ah thlan a ni bawk a, tun season-a goal 30 khung tawh forward hi a inlan a nih phawt chuan goal khung châkin a tuihal leh ang.
Spurs coach Antonio Conte chuan, "Liverpool ṭhat lohna lai zawn hmuh chu thil harsa tak a ni," tiin a sawi a, Italian coach thusawi tidiktu chu Liverpool result a ni - Spurs tan a awlsam dawn lo.
Chutihrual chuan London club hian Premier League player 'hot' ber pawl Harry Kane leh Son Heung-min an nei ve tho tih hriat a ṭha a, Villarreal laka goal hnih chhuahtu Reds tlarhnung tan insiamṭhat a ṭul.
Chetsual thiang lo
Liverpool-in champion turin chak vek an mamawh a, City chetsual an chan tel a ngai bawk. Spurs erawh season thara Champions League khel turin an kutah engkim a la innghat tiin a sawi theih.
London club hian Liverpool an hmachhawn zawhah an elpui Arsenal an la hmachhawn leh dawn - an fixture hi hautak angin lang mah se Gunners an hmachhawn zui tur hi an tan chanchin lawmawm a ni.
Conte naute hian an hmabak match liah hnehna an chan vek chuan point 75 an nei ang a, Arsenal lehthalin top four huang chhungah an invawrh daih thei. Mahse, hna hmasa chu Liverpool hneh a ni.
Chutihrual chuan Spurs lenna tur hi Anfield a ni tih hriat a ṭha - tun season inelna hrang hranga vawi thum chauh la tlawm Liverpool hi tun season Anfield-ah vawi khat chiah an la tlawm!
City beiseina
Khawvel coach ṭha sawi apiangin Pep Guardiola hming lam rik a ni ṭhin a, mahse, Spanish coach hian Barcelona a chhuahsan hnuah Champions League nomawi a chawi leh tawh lo.
Tun season-ah pawh semifinal-ah Real Madrid ngam loin an tla a, nomawi beisei theih an neih awmchhun chu Premier League chauh a ni ta - Liverpool lakah an hloh leh a nih ngat chuan sum hmang hnem Pep a mualpho ang.
City tan Pathianni zan dar 9:00-ah Newcastle United hneh ngei ngei a ṭul tihna a ni a, Liverpool tana beiseina siamsak a thiang lo. Mahse, City hi an ṭhat dan berin an khel thei lo mai thei a, he thu buatsaih lai hian Real laka hliam vanga lakchhuah ngai Kyle Walker dinhmun a la chiang lo.
Kyle Walker a awm loh chuan City tlarhnung a nghing leh sawtin a rinawm a, an match hnuhnung pangaa vawi khat chiah tlawm Magpies-in beisei an nei ngam ang.
Manchester City
May 8 Newcastle United (H)
May 11 Wolves (A)
May 15 West Ham (A)
May 22 Aston Villa (H)
Liverpool
Zanin Tottenham (H)
May 10 Aston Villa (A)
May 17 Southampton (A)
May 22 Wolves (H)
* FA Cup Final : Chelsea (May 14)
Champion Inum
• Premier League-ah hian point zawhah goal difference en a ni a, chumi zawhah goal khung zat en tur a ni.
• Point, GD leh GF-a chinfel theih a nih loh chuan head to head en tur a ni a, Point bakah Away goal en tur a ni. Liverpool leh Man City te hi 2-2 ve vea an inhnehtawk avangin head to head a en theih dawn lo.
• Reds leh City hi an point hmuh zat a inang a, an goal difference bakah an goal khung zat a inang bawk chuan playoff hmangin champon tur an zawng ang.