West Ham beiseina ti tawptu Frankfurt
West Ham tan European football chu a tawp leh ta. David Moyes-a naute hian beiseina sang tak nen Germany an pan a, player kim loa khel chungin Eintracht Frankfurt lakah 1-0 in an tlawm, inkhel pahnih belhkhawmah 2-1 in an chak lo.
Europa League semifinal inkhel dangah Rangers chuan RB Leipzig 3-1 in an hneh thung, an intawn hmasakah 1-0 in chak lo mah se Scottish club hi 3-2 in an tlang. Rangers leh Frankfurt ten May 18 hian Seville khawpuiah nomawi an inchuh ang.
Boruak a sang
London Stadium-a an inkhelh ṭumin West Ham hian hma takah goal an chhuah a, thapui thawh let mah se 2-1 in an chak lo. Tun hma lama thil mak an thlentir tawh angin Eintracht Frankfurt hi lehthal theih ngei an la beisei.
Fans thawm na tak nen Germany an pan a, inkhelh hma niah team pahnih fans inkarah buaina a chhuak - police sawi dan chuan he buaina avang hian mi 30 chuang man an ngai hial, ball an pet ṭan hma aṭangin boruak a lum hle.
Mipui 51,500 lenna Deutsche Bank Park-ah Frankfurt ṭantute chu an in beng khat vek a, a kil sir khatah Hammers ṭantute an inhnawh ve thung, mikhual team ṭantute tan mualneitu lam au zam chu thil harsa tak a ni ang - German mipuiin an al hneh hle a ni.
An inkhel ta
A chhehvel boruak a san ang bawkin mual chhungah pawh boruak a lum. Minute 19-na lekah defender Aaron Cresswel chu hnawhchhuah a ni! Jens Petter Hauge a tih tluk avangin yellow card pek a ni a, mahse video assistant referee hman hnuah red card phawrh a ni.
An kim loh hnu lawkah Hammers an talbuai, minute 26-naah Ansgar Knauff siamsak chu vengtu nei lo Rafael Borre chuan a khung, inkhel hmasa nena belh khawmin Bundesliga club lamin 3-1 in hma an hruai, tho chhuak turin West Ham tan a harsa tawh.
Dinhmun hniama an din laiin David Moyes pawh a insum zo lo. Hammers manager hian khelmual sira ball chhartu (ball boy) chu ball a pet per a, a insum theih loh vang hian red card pek a ni ve bawk.
English club hian 1975-76 season khan European Cup Winners' Cup final an lut, hemi ṭum hian semifinal-ah Frankfurt hi an hneh, a hnu lamah erawh European football-ah final an la lut leh lo a ni.
A tir kha a pawi
West Ham manager Moyes chuan, "Final thlen theihna remchang kan nei a, kan hmang ṭangkai thei lo hi a pawi ka ti hle. A nihna takah chuan London khawpuia kan inkhelh ṭum khan, second 30 leka goal kan chhuah kha a pawi ta zel a ni ber.
"Tun ṭumah pawh khel ṭha zawk mah ila kan vanduai. Cresswell hnawhchhuah a nih theih nana Frankfurt coaching staff chet dan kha mak ka ti a, khatiang kha thil mawi lo a ni. Ball boy laka ka chet dan erawh a dik lo, ngaihdam ka dil," tiin a sawi.
Frankfurt coach Oliver Glasner chuan, "Hamrik hnuhnung ber a rik hma kha chuan ka awm hle hle thei lo. Zan hmasa lama Champions League inkhelah hun tawp dawnah thil mak a thleng, kha thil kha rilruah a cham ve reng.
"Inkhel harsa tak a ni, a bik takin second half-ah kan goal venghim turin kan thawhrim a ngai hle. Kum 42 hnua a vawi khat nan European football-ah final kan lut leh ta, player leh fans ka lawmpui," a ti.