Mumang ramah Rangers

Mumang ramah an cheng a, harh chhuak loin tunah chuan Europa League final an thleng ta. Rangers hi RB Leipzig mualah 1-0 in an tlawm a, mahse anmahni mualah Bundesliga club hi lo mikhual ve lehin 3-1 in an hneh.

Giovanni van Bron-ckhorst enkawl team Rangers hian James Tavernier leh Glen Kamara te hmangin chawlhlawk hmain goal an khung, second half-ah Leipzig lamin Christopher Nkunku hmangin sut mah se, hun tawp dawnah John Lundstram-a'n chakna goal a khung.

Rangers hian semifinal kalkawngah hian team ṭha Borussia Dortmund pawh an lo hneh tawh, chak lo zawk tura rinkai ni ṭhin mah se thapui nen an bei a, an thawhhona a ṭhat miau avangin hmalam an pan zel.

Scottish club hian European trophy an lak hnuhnung ber aṭangin kum 50 a liam tawh, kuminah mellung pawimawh phun leh theihna remchang an nei mek - nomawi chawi turin Eintracht Frankfurt hneh chiah a ngai tawh.

Rangers coach Van Bronckhorst chuan, "Kan lawmna hi thua sawifiah mai theih pawh a ni lo, inkhelh ṭan hma khan ka naute hnenah hei hi ka sawi. 'Tlang tur chuan kan theihna zawng zawng kan hlan a ngai' ka ti. Leipzig khan min bei let dawn tih kan chiang.

"Hun tawp hma minute 10 chauh awm tawha chakna goal neih theih kha a hlu, ka naute khan an phu ang ngeiin Europa League final an in pet kai," tiin a sawi a, a hun tawn tawha hlimawm zinga mi a nih thu a sawi bawk.

Europa League Final
May 18, Ningani
Eintracht Frankfurt 12:30 AM Rangers

Europa League Semifinal
First Leg Results
West Ham 1 - 2 Eintracht Frankfurt
WHU: Michail Antonio 21'
EIN: Ansgar Knauff 1'; Daichi Kamada 54'
RB Leipzig 1 - 0 Rangers
LEI: Angelino 85'
Second Leg Results
Eintracht Frankfurt 1 - 0 West Ham
EIN: Rafael Borre 26'
(Aggregate-ah Frankfurt hi 3-1 in an chak)
Rangers 3 - 1 RB Leipzig
RAN: James Tavernier 18'; Glen Kamara 24'; John Lundstram 80'
LEI: Christopher Nkunku 70'
(Aggregate-ah Rangers hi 3-2 in an chak)