Quarterfinal-ah Nadal a lut

Rafael Nadal chuan match point vawi li a inchhanhim hram, a khingpui David Goffin chu harsa taka hnehin Madrid Open quarterfinal a in vaw kai, a match lehpekah chuan Carlos Alcaraz nen an inkhel ang.

Ningani zan inkhelah Nadal hi awlsam takin a chak bik lo. Set thumna bikah tie break an khel rei, a tawpah erawh thawnhriat ngah leh player ṭha zawk hi 6-3, 5-7, 7-6(9) in a chungnung zawkah a ṭang hram.

Spanish star Nadal tan tennis a khelh hun chhungin match 1050 a chak tlinna a ni a, Grand Slam dawta inelna ngaihhlut Masters 1000-ah hian quarterfinal a luh vawi 99-na a ni nghal bawk.

Grand Slam vawi 21 champion tawh Nadal chuan, "Match tam tak zinga theihnghilh tawh loh tur a ni. Hun tawp dawna Real Madrid chak kha ka hre reng a, kha thil khan kei pawh min fuih phur a ni," a ti.

Nadal hian a naupan lai chuan football a khel ve ṭhin, Spanish khawpui Madrid chu a hun hmanna a ni a, naupang dang ang bawkin Real Madrid a atchilh thei hle, tennis huangah zuang lut mah se Real hi a la ṭan reng, an inkhel pawh a hmunah a en fo.

Inkhel dangah Alcaraz chuan Cameron Norrie 6-4, 6-7, 6-3 in a hneh. Spanish rawlthar Alcaraz hi player beiseiawm tak a ni a, kum 19 mi chauh la ni mah se a puitling tawh hle, clay court chu a inkhelh thiamna hmun a nih avangin Nadal hnungzui thei tura ngaih a ni.

Madrid Open champion lai Alexander Zverev pawh a la chak zel. German tlangval hian Lorenzo Musetti chu 6-3, 1-0 in a hneh. Set hnihna an khelh laiin Italian player hi a malpui hliam vangin a khel zui thei lo.

Seeded parukna Andrey Rublev pawhin Dan Evans 7-6(7), 7-5 in a hneh. Russian player hian Stefanos Tsitsipas a hmachhawn leh ang, Greek tlangval hian Grigor Dimitrov 6-3 6-4 in a lo hneh ve bawk.

Seeded pakhatna Novak Djokovic erawh inkhelh hah ngai loin a tlang. Last 16-a a hmachhawn tur Andy Murray chu damlohna vangin a inhnukdawk, a match lehpekah chuan Hubert Hurkacz a hmachhawn ang.