Mourinho mittui a tla - ECL final an lut
Pa hro hrang na tak, a duh duh sawi, mi rilru hliam pawh pawi ti lo, in la pa ve tak kha a ni - mahse, Europa Conference League final-a AS Roma a hruai thlen meuh chuan Jose Mourinho a insum zo lo a, a mittui a tla asin!
Ningani Zan khan ECL semifinal-ah AS Roma an chak a, an mikhual Leicester City chu 1-0 in an hneh - inkhel hmasa nena belhkhawmin 2-1 in an chak a, Mourinho-a'n European football-a final khel turin Roma a hruai thleng leh ta.
Italian club tana goal awmchhun hi Tammy Abraham-a khung a ni a, Foxes-in a chhanletna tur an neih loh avangin nomawi chawi an beiseina chu an mangṭha a ṭul ta rih.
ECL semifinal inkhel dangah Marseille leh Feyenoord chu 0-0 in an inhnehtawk a, inkhel hmasaa 3-0 a lo chak tawh Feyenoord an tlang a, kum 2002 hnua a vawi khat nan European final an khel dawn - AS Roma nen champion an inchuh ang.
Corner - Foxes hmelma!
Tun season-a beisei phak lo Leicester-in Premier League-a an match hnuhnung berah Tottenham Hotspur chu 3-1 in an ngam lo a, inkhelh zawhah coach Brendan Rodgers chuan corner aṭanga ball kal ven dan zir ṭhat an mamawh thu a sawi.
Liverpool boss hlui thusawiin a naute khelh danah danglamna a thlen lo tih a lang a, inkhel ṭan aṭanga minute 11 chhungin vawi li ngawt corner an chawi hman - Premier League club ṭantute thla a muang lo.
Minute 11-naah Foxes hian corner aṭangin goal an chhuah ta nge nge a, Lorenzo Pellegrini-a corner aṭanga ball kal chu player dang zawng aia zuang sang Abraham chuan keeper Kasper Schmeichel tana dan rual lohin a tauh lut.
Kum 25 mi Pellegrini chu Foxes tan lu tihaitu a ni a, Roma attacking midfielder hi set piece aṭangin a hlauhawm ṭhin hle - tun season-ah goal 13 khungin assist vawi sarih a nei ta.
Mangṭha Leicester
Season hmasa FA Cup champion Leicester tan result duhawm a ni lo - Rodgers-a'n season ṭantirah ECL kalphung a hriat loh thu sawi mahse, league lama an chet chhiat avangin Foxes tan chuan ECL hi Europa League kalkawng duhawm a ni.
Mahse, Foxes-in Roma an paltlang thei miau lo a, season tharah Europa League an khel thei dawn lo chiang ta a, league-ah thil mak danglam a thleng a nih chuan ECL khelh theih dan a la awm thung!
Roma lakah pawh Foxes-in chak an phu lo - first half chhung zawng target-ah shot an nei lo a, tlarhmaah Jamie Vardy a reh a, bench aṭanga luhtir Kelechi Iheanacho-a'n danglamna a thlen bik lo.
Hun tawp hnaih lamah Leicester-in goal khung tumin, kil tin aṭangin an bei a, mahse, Roma tlarhnung tan hlauhthawnawm khawpin an che thei lo - Kelechi Iheanacho leh James Maddison te hun neih pawh shot naran mai a ni.
Ṭah lai bang la...
Inkhelh zawhah Mourinho mittui a tla a, Portuguese manager hian a coaching career-ah ECL final aia ropui zawk hmachhawn fo tawh mah se a hnuk a ulh a, a insum thei lo. Mourinho chuan, "Ka hlim takzet a, kan tan chuan hei hi Champions League a ni.
"Rome khawpuia hna thawh a, chen a, hun hman bawk chuan he club hi i lungphu ang mai a ni - he khawpui club dik tak hi a nih miau avangin. Roma ka zawm ni aṭang khan he club ropuizia hi ka hre nghal. Mahse, hnehna an chang tam loin, final pawh an la khel tam lo. He club sulhnu leh a ropuina hi a inmil tawk lo a ni.
"Team pangngai tak kan din thei a, zawi zawia ke pein Premier League team kan hneh thei a ni. Zanin aia hun ropui zawk hi ka tawng fo tawh a, mahse, zanin ka thinlung hi keima tan ni loin he khaw mipui leh player-te tan a ni," a ti a, Roma fan-ten an ngainat belhchhah ang!
Mourinho hian FC Porto leh Inter Milan chu Champions League-ah nomawi a lo chawipui tawh a, Manchester United chu Europa League-ah a champion pui tawh bawk - European football final-a club pali hruai thleng thei coach hmasa ber a ni.
Thawhhona
Khawvel coach ropui sawi apianga hming lam rik tawh tur Mourinho hian inkhelh hma aṭangin fan-te a ti phur tawh a, Stadio Olimpico-a fan-te au thawm kha player tam tak tan chuan zamna tham a ni daih tawh.
Mourinho hian inkhelh hmain, "Min ṭan tur ringawtin stadium-ah lo kal suh u. Min inkhelhpui rawh u," tiin fan-te a sawm a, an chak hnuah mittui nen a lawm zui - kum 1991-a UEFA Cup final an khelh hnua Roma-in European football final an khelh leh hmasak ber a ni.
Roma goal awmchhun khungtu Abraham chuan, "Inkhelh ṭan hma khan fan-ten hnehna min chanpui daih tawh a, warm-up chhung zawng pawhin an thawm kan hria. He hnehna hi kan team leh an tan a ni," a ti.
Foxes boss Rodgers chuan, "A tawp thlengin kan bei a, mahse, chance ṭha kan nei thei lo a ni," tiin an tlawm a pawm a, "Final kan luh loh avangin kan hnual a, mahse, kan phak china ṭha taka season khar a, season thar atana inpuahchah nghal kan duh a ni," a ti bawk.
Europa Conference League
Semifinal
First Leg
April 28, Ningani Zan
Leicester City 1 - 1 AS Roma
LEI: Gianluca Mancini 67' (OG)
ROM: Lorenzo Pellegrini 15'
Feyenoord 3 - 2 Marseille
FEY: Cyriel Dessers 18', 46'; Luis Sinisterra 20'
MAR: Bamba Dieng 28'; Gerson 40'
Second Leg
May 5, Ningani Zan
Marseille 0 - 0 Feyenoord
*Agg-ah 3-2 in Feyenoord an chak
AS Roma 1 - 0 Leicester City
ROM: Tammy Abraham 11'
*Agg-ah 2-1 in Roma an chak
Final - May 25, Nilaini Zan
AS Roma 12:30 AM Feyenoord