Arteta chungah Arsenal-in rinna an nghat

Arsenal chuan an manager Mikel Arteta chungah rinna an nghat a, kum 2024-25 season thleng daih contract an ziah thar pui. Gunners hmeichhe team enkawltu Jonas Eidevall pawhin contract thar hi a ziak ve bawk.

Spanish manager Arteta hian December, 2019 aṭang khan North London club hi a enkawl ṭan. Season kal laiah palina an ni mek a, season tharah Champions League khelh an beisei mek - hmabak erawh an la ngah.

Player a nih laia Arsenal captain hlui Arteta chuan, "Hmasawn kan tum, team ṭha dangte elphak turin kan inbuatsaih mek a ni. Chumi ti tura ka chunga rinna an nghat ngam hi ka lawm takzet.

"Team siamṭhat tumin hma kan la a, player mai bakah hna thawktu peng hrang hrang thlenga tih hmasawn kan tum. Chutiang tithei tur mihring chu kan awmkhawm niah ka ngai, fans lawmna kan siam theih zel ka beisei," tiin a sawi.

Arsenal director Josh Kroenke chuan, "Mike-a inpekna leh thawhrimna hi mitinin an hmu, ani kaihhruaina hnuaiah hian hma lam kan pan thei ang tih hi kan ring tlat a ni, hlawhtlinna pawh min chanpui theih ngei ka beissei," tiin an coach chungah rinna an nghat tih a sawi ve bawk.

Premier League table-ah Arsenal hi palina an ni mek, an hnuaia awm Tottenham aia an sanna chu point hnih chauh a ni thung. Chutihrualin pathumna Chelsea nen an inkarah pawh point thum chauh a awm.

Gunners hian Pathianni zan dar 6:30 hian Emirates Stadium-ah Leeds United an mikhual dawn, an elpui Spurs hi champion tum Liverpool khelmual Anfield-ah an lenglut thung ang.