Gokulam-in champion an hnaih?

Tun season I League-ah champion lai Gokulam Kerala-in nomawi an humhim dawn. Nizan khan Mohammedan-in Churchill Brothers an hmachhawn a, Kolkata club hi an tlawm a nih chuan Kerala club hi an champion ang.

Mohammedan hi an chak a nih pawhin zanin dar 8:00 hian Gokulam-in Rajasthan an hmachhawn dawn a, Kerala club hian hnehna an chang a nih chuan an champion tho dawn.

Malabarians hian tun season-ah hneh loh an la tawng lo a, match 15 aṭangin point 37 an hmu a, goal 40 khung tawhin clean sheet vawi ruk ngawt an nei tawh.

Gokulam hian Rajasthan bakah Sreenidi Deccan leh Mohammedan te an la hmachhawn dawn a, zanina an champion ta lo a nih pawhin nomawi chawi turin an dinhmun a la ṭha tho.

Football tuina state Kerala hi tun hnaiah an che ṭha hle. Indian Super League-ah Kerala Blasters pahnihna an ni a, Santosh Trophy khelh zawh takah Kerala hi a thlengtu niin an champion bawk. Indian Women's League-ah pawh Gokulam hmeichhe team chu champion lai an ni a, season kal mekah pawh hmahruaitu an ni bawk.