Hri len hnua point la hmu lo Arsenal

Arsenal chuan Covid-19 len hnua Premier League match pahnih an khelh tawhah point an la sual chhuak lo, champion lai Manchester City laka an tlawm hnuah table mawng lama talbuai lai Brighton mualah 2-1 in an tlawm.

Pound maktaduai 72 man Nicolas Pepe-a'n kum mawi takin pet lut mah se Lewis Dunk chuan a sut a, hun tawp dawnah Neal Maupay-a'n chakna goal a khung - kum 2011 aṭanga an hman Amex Stadium-ah a vawi 100 nan hnehna an chang.

Inrinni zan Premier League inkhelah Arsenal lamin defender Pablo Mari leh midfielder Granit Xhaka te hliam vangin an chawr thei lo, Spanish tlangval Mari phei chu tun season chhung an chhawr thei tawh dawn lo; Brighton lakah keeper Bernd Leno chu zawn chhuah a ngai bawk.

Chawlhlawk an hman hma deuhin box chhunga ball kang chu Leno-a'n harsa lutuk loin a man, ball um pheitu forward Maupay chuan German keeper hi boruaka a zuang kang lai chu na takin a su a, khelmuala bawihsawm a nih hnuah zawn chhuah a ngai.

Gunners keeper Leno hi hliam a tawh danah a lawm lo, zawn chhuah a nih lai hian thinrim takin Maupay hi a kawk zui; hliam vanga an buai lai hian a teammate zingah a thlavang hauhtu an awm lo! Captain ropui Tony Adams leh Patrick Vieira te hunlai nen chuan boruak a danglam ta hle.

Hamrik hnuhnung a rik hnuah Arsenal midfielder Matteo Guendouzi chuan Maupay lakah buaina tenau a siam leh hnuhnawh. Khelmual an chhuahsan dawnin boruak sang thar leh mah se hun a tawp tawh - a nih tur ang in thil a ni zo vek tawh.

Maupay chuan, "Player ṭhenkhat kha chuan dawhtheih an zir a ngai, an ṭawng hnem lutuk kha an phu tawk an hmu. Chawlhlawk dawnah khan Mikel Arteta ka hmu a, ka tihpalh a nih thu ka sawi hial kha a ni a, ball lak tuma zuang kang ka ni," a ti.

Arsenal manager Arteta chuan a keeper inhliam chu a dinhmun tak la hriat loh mah se a ṭhat loh hmel tih a sawi. Intihpalh chungchang sawi zuiin Arteta chuan, "Player-te hian midang tih nat an duh hi ka ring ngai lo, tun ṭuma mi pawh kha tih luih a nih ka ring lo," a ti.

Arsenal tan hmasawn ngaihna lai a tam, tlarhnung mai bakah a hma lam pawh siamṭhat an ngai. Brighton lakah inkhel hmuhnawm an chhawp chhuak lo. Bukayo Saka, Pierre-Emerick Aubameyang leh Alexandre Lacazette ten hun ṭha an bawhpelh vek, an hriam tawk lo.

Man City an hmachhawn ṭuma squad-a awm lo Mesut Ozil chu bench-ah a ṭhu tluan, goal mamawh laiin Joe Willock, Reiss Nelson leh Eddie Nketiah te tan hmun a awm laiin Ozil leh Gabriel Martinelli tan erawh hmun a awm lo thung.

Ningani zana Southampton an lenchilh hunah Arteta tan duhthlan tur an tlem sawt dawn, player dam chiang a neih zingah tu nge lut ang tih pawh hriatthiam a har. Tlarhnung phui lo chu buaina lian a nih rualin Auba leh Lacazette khelh dan tur pawh ngaihtuah tham a tling dawn.

Manchester City an hrem vangin Premier League pangana tan season tharah Champions League a khelh theih hmel, hmun ruak inchuh boruak pawh a sang dawn. Manchetser United, Wolves, Sheffield United, Tottenham, Crystal Palace ten beisei an la nei, Arsenal pawh a la sawi tel theih.

Match khelh hmabak pariat an la nei a, Gunners hian pangana ni lai Man United an phak lohna chu point ruk a ni, an inkar a zau lutuk lo. Mahse, tuna an khelh dan en chuan Arteta naute hian an chunga awmte hi an tlanpelh mai hmel loh.

Hnehna changtu Brighton tan erawh point thum hlu bik a ni, point 28 neiin 15-naah an awm - season thara Premier League khel zui turin beiseina an neih ṭhat phah hle. Seagulls hian Thawhlehni zanah Leicester an tlawh dawn a, Premier League khel zel turin point khat tal hmuh a pawimawh ang.