London club an sang tual tual Costa vanga buai lo Chelsea

Chelsea-in Diego Costa tel loin Premier League champion lai Leicester City 3-0 in an sawp a, Tottenham Hotspurs-in Harry Kane-a hattrick hmangin West Bromwich Albion 4-0 in an sawisa bawk.

Antonio Conte hoten point 52 hmuin league hmahruaitu an ni a, pahnihnaa awm Mauricio Pochettino nauten hmahruaitu hi point sarih chiahin an pha lo. Nizan khan Old Trafford-ah Liverpool leh Manchester United an khel a, result-in table chunglam a la sawi danglam thei bawk.

Costa tel loin
Chelsea-in league match hnuhnung berah Tottenham Hotspurs an hneh lo a, champion lai Leicester City an hmachhawn hmain chanchin duhawm loin a ṭhawng bawk. Brazil-a piang forward Diego Costa chu squad-ah telh a ni lo a, Spain international striker hi coach Conte nen an inkarah khi a a awma ngaih a ni.

Italian manager Conte-a'n tlarhmaah Eden Hazard, Pedro leh Willian a rem a, King Power Stadium-ah minute rukna lekah goal an khung nghal. Beligan forward Hazard-a siam chu Marcos Alonso-a'n a khung.

Chelsea-in Bournemouth aṭangin defender Nathan Ake an la let a, Spanish defender Alonso-a'n a position hloh mai a tum lo. Kum 26-a upa wing back Alonso hian minute 51-naah goal hnihna a khung leh a, Conte-a'n ngaihtuah buai ngai loin a hmang chhunzawm zel ang.

Blues-in minute 71-naah Pedro hmangin goal thumna an khung a, Spanish forward goal hi Willian-a siamsak a ni. Barcelona forward hlui Pedro hian match hnuhnung paliah goal li a khung tawh.

Leicester City-in champion zia an chhuah thei lo a, goal luh hmaa Ahmed Musa-a'n keeper Thibaut Courtois tana hna a siam sak bak goal zawnah an pet leh tawh lo.

Spurs an vul
White Hart Lane-ah Tottenham tan Kane-a'n hattrick a siam bakah West Brom defender Gareth McAuley-a'n an lamah a tilut a, mualneitu hi 4-0 in an chak. Mauricio Pochettino tana thu lawmawm lo awmchhun chu defender Jan Vertong­hen inhliam a ni a, Belgian defender hi minute 54-naah lakchhuah a ni.

Kum 23-a upa Kane-a'n league-ah goal 13 a khung tling tawh a, English forward hian a tluk loh chu goal 14 khungtu Diego Costa leh Alexis Sanchez te chiah an ni. Spurs forward hian goal hmaah theihna sang tak a nei tih a lang a, midfielder Christian Eriksen leh Dele Alli te inrintawkna leh theihna san zia hmuh hmaih a theih loh bawk.

Kane-a'n hattrick a siam nan hian Alli-a'n box pawn aṭangin Baggies defender a pir khum a, English forward hian a duh thalin hlap fuh lo mah se keeper Ben Foster tan dan theih a ni chuang lo.

Tottenham boss Mauricio Pochettino chuan, "Kan khelṭha takzet a, kan puitlin zia kan lantir bawk. Season liam ta aṭang khan thil tam kan zir a, thil lian tham kan beisei a nih chuan huai taka kan hmachhawn zel a ṭul a ni," tiin a sawi.

Spurs hian January 21 zanah Etihad Stadium an tlawh dawn a, Manchester City nena an inkhel tur hi a pawimawh ang. Hmahruaitu Chelsea-in Pathianni zanah coach thar hnuaia phur thar Hull City an mikhual dawn a, Blues tan pal zam theih a ni bik lo ang.