Costa hmalam chiang lo
Chelsea leh West Brom inkhelh ṭumin Diego Costa a inlan lo a, Spanish international striker telh loh chhan hi inkhelh hmaa tarlan dan chuan manager Antonio Conte nena inhmuh thiam loh vang a ni.
Blues-in Costa tel loin Baggies an chak a, inkhelh banah Italian manager Conte insawifiah mah se rinhlelh tur a la tam. Juventus manager hlui Conte chuan, "Diego hian a hnung zângah na a neih avangin Thawhlehni
aṭang khan training a zawm tawh lo. China nena sawi zawm a nih chungchangah erawh engmah ka sawi thei lo a, ka tawnhriat aṭanga ka hriat chu press conference-ah ni loin dressing room-ah harsatna hi chu chinfel tur a ni. Thudik chu a inhliam kha a ni a, a khelh leh hun tur hi kan la hre thei lo," tiin Costa khelh loh chhan a sawi fiah.
Chelsea tana goal hnih khungtu Marcos Alonso chuan, "Journalist hian inphuahchawp a ni. Diego hi a hnung na vangin a dam sam lo a, amah hi kan bulah a hlim a, Chelsea-ah season ṭha tak a hmang ang," tiin thu dik loh chhuahah thu thar thehdarhtute a puh.
Football expert lam chuan Chelsea-in Diego Costa aṭanga pound maktaduai 60 an lak theih chuan Conte hian Brazil-a piang Spain tana khel forward hi chhuah mai se an ti. Costa hian pound maktaduai 32-in kum 2014 khan Atletico Madrid aṭangin Chelsea a zawm a, Brazilian ni chunga Spain tana khelh a thlan avangin player rinawma ngaih a ni lo a, khelmualah a nungchang a ṭha lo bawk. Italian manager Conte-a'n dressing room-ah manager dang aiin hna a ngah a, tunah erawh Chelsea boss hian hna a thawk ṭha hle.