Point hmuh tum Shillong Lajong

16th January, 2017

North East aṭanga I League khel hmasa ber Shillong Lajong-in tun season-ah point an la hmu lo. Thawhlehni tlai dar 1:30 hian RG Stadium-ah Lajong-in Mizo club awmchhun Aizawl FC an hmachhawn ang.

North East Derby atan ticket zawrchhuah a ni leh tawh. Aizawl FC-in Mizo mipui nena inmil turin ticket man an titlawm. India rama club football inelna sang ber en man hi Rs 200 leh Rs 100 chauh a ni.

Vawi 2 chak lo
Shillong Lajong-in an match hmasa berah Sree Kanteerava Stadium an tlawh a, champion lai Bengaluru FC lakah 0-3 in an tlawm. Thangboi Singto hote hian Kolkata-ah Mohun Bagan rawn tlawh chho nghalin point an hlawh chhuak chuang lo.

Zirtawpni zan khan Darry Duffy goal hnih hmangin Mariners-in an mikhual Lajong 2-0 in an hneh a, Rabindra Sarobar Stadium-a inkhelah Mohun Bagan tan Jeje Lalpekhlua a tawpah a inlan. Lajong hian point la hmu lo mah se an hneh loh hi I League champion leh Federation Cup champion an nih avangin Thangboi Singto hote hi an point hmuh aṭanga teh chi an ni lo ang.

Aizawl an thleng
Lajong-in January 14 zanah Kolkata-ah match an nei a, January 15 tlaiah RG Stadium, Mualpuiah training an nei leh tawh.

Coach Thangboi Singto chuan, "Fixtures hi chu a lungawi thlak zan loh a ni. Khual-mualah a zawnin vawi thum kan khelh a ṭul laiin Mohun Bagan leh Bengaluru erawhin match hmasa pathum an mualah an khel nghal a, dinhmun insiamṭhatna hman a awm a ni," tiin champion tura rinkai pahnih fixtures a ṭhat bik thu Vanglaini palai a hrilh.

Shillong Lajong hian match hnih khelhah point an hmu lo a, Aizawl FC lakah point an hmu leh bawk chuan insiamṭhat a har chho ang.

Chutihrualin Lajong hi Mualpuia an inkhelh zawhah erawh Shillong-ah a zawnin match nga an khel dawn a, zin chauh an neih ve dawn loh avangin insiamṭhatna hun ṭha an nei dawn a ni.

Mizo Pali
Shillong Lajong-in I League khel tur hming 27 an thehluh zingah Mizo paruk an awm. Tun ṭumah hian Mizo pali Jacob Lalrawngbawla, Zodingliana Tochhawng, Isaac Vanmalsawma leh Samuel Lalmuanpuia te an rawn zin a, Joseph Lalfakzuala leh Lalrammuana te an tel ve lo.

Coach Thangboi hian Aizawlah Bengaluru FC leh Mohun Bagan hmachhawn tura a hruai player 19 bawk a rawn chhawm a, matchday squad-ah hian player 18 ziah luh theih a ni.

Mizo pali zingah Samuel Lalmuanpuia la inlan ve lo mah se Zemabawk North tlangval Samuel hi season liam ta I League match pawimawha Aizawl FC lama goal khungtu kha a ni a, RG Stadium-a a inlan a nih pawhin a mak lo ang.

Yuta a lo let
MPL4-a Aizawl FC champion puitu Yuta Kinowaki chu Aizawlah a rawn kir a, tun ṭumah erawh Japanese midfielder hian Shillong Lajong jersey a ha tawh thung dawn. AFC midfielder hlui hian match hnih khelh tawhah inkhel bul a ṭan ve ve.

Shillong Lajong hian foreigner neih tur zat pali an nei kim tawh a, Romanian defender Dan Gelu Ignat-a'n captain armband hrengin Manipuri defender Chinglensanna Singh nen an inkawp a. Tlar hmaah Brazilian forward Fabio Henrique Pena leh DSK Shivajians aṭanga an lakluh Cameroonian forward Aser Pierrick Dipanda Dicka te an inkawp bawk.

Season liam ta khan RG Stadium-ah goal awm loin AFC leh Lajong an inhnehtawk a, Shillong-ah Thangboi Singto hote an chak zui avangin Aizawl FC-in I League khel leh turin AIFF khawngaihna an mamawh phah ta a ni.

Aizawl FC hmachhawn tur Lajong Squad
J No. Name State/Ram Pos BFC (0-3) MB (0-2)
1 Vishal Kaith Himachal Pradesh GK 90 90
34 Phurba Tempa Lachenpa Sikkim GK 0 0
6 Chinglensanna Singh Manipur CB 90 90
31 Dan Gelu Ignat Romania CB 90 90
17 Sh. Sandeep Singh Manipur CB/DEF 0 0
23 Pritam Kumar Singh Manipur LB 90 90
3 Nim Dorjee Tamang Sikkim RB 90 90
4 Rupert Nongrum Meghalaya RB/RW 4 45
13 Isaac Vanmalsawma Mizoram (Hnahthial) RW/LW 90 83
29 Th. Bipin Singh Manipur RW/LW 69 45
19 Redeem Tlang Meghalaya LW/RW 86 7
26 Yuta Kinowaki Japan CM 61 90
14 Jacob Lalrawngbawla Mizoram (Tlungvel) CM 29 -
7 Zodingliana Mizoram (Armed Veng) CM 0 90
11 Hardy Cliff Nongbri Meghalaya CM 90 0
8 Fabio Henrique Pena Brazil FW 90 90
10 Aser Pierrick Dipanda Dicka Cameroon FW 21 87
25 Alen Deory Assam FW 0 3
9 Samuel Lalmuanpuia Mizoram (Zemabawk N) FW - 0
Coaching Staff
Coach Thangboi Singto
Asst Coach Gumpe Rime
Manager Birendra Thapa
Physio Soumya Bhattacharjee