Africa Cup of Nations A ṭan zanah chak zo an awm lo
Inrinni zan khan Africa Cup of Nations vawi 31-na chu Stade de l'Amitie, Libreville-ah khelh ṭan a ni a, inkhel pahnih awm nghalin hnehna chang zo an awm lo.
Match hmasa berah inelna thlengtu Gabon tan Borussia Dortmund striker Pierre-Emerick Aubameyang chuan minute 52-naah goal hmahruai a khung a, chak tura ngaih an nihna a nemnghet. Mahse, a vawi khat nana Africa Cup of Nations khel Guinea-Bissau hian an beidawn duh loh rah an seng a, hun tawp hma chiahin Juary Soares chuan free kick aṭanga ball lokal chu tauh lutin 1-1 in an inhnehtawk.
Gabon coach Jose Antonio Camacho chuan, "Tournament match hmasa bera hnehna chan nghal hi a harsa a, a lehpek aṭang chuan thi leh thau pawlhin kan khel tawh ang," a ti. Gabon hian Nilaini zanah Burkina Faso an hmachhawn leh ang.
Guinea Bissau coach Baciro Cande chuan an match hmasa bera point an hmu chuan an inkhelh leh turah phurna a siamsak ngei a beisei thu a sawi tel ve bawk.
Cameroon an chelh
Group A inkhel dangah Cameroon tana Benjamin Moukandjo free kick pet luh chu Burkina Faso tan Clinton N'Jie-a'n a sut a, 1-1 in an inhnehtawk.
Tun ṭum Africa Cup of Nations-ah hian Cameroon player pariat zet chu koh ni mah se inelna hmachhawn turin an kal lo! Heng zingah hian Liverpool defender Joel Matip pawh a tel. Cameroon hian an match hmasa berah hian goal khung nghal mah se an inkhelah an inlungrual tawk lo tih a lang a, an tlarhnung phui loh leh inrem fel loh an tuar.
Afcon hi?
Africa Cup of Nations hi kum 1957 khan a vawi khat nan khelh ṭan a ni a, team pali telin Egypt an champion. Kumin hi a kum 60-na niin vawi 32 neih a nihna chiah niin ram tel zat chu 16 an ni.
Ram inlan 16 te hi group pali - A, B, C leh D-ah te ṭhen hran an ni a, group pakhatah ram pali zel an awm. Group tina mite an inkhelh kual vek hnuah a sang pahnih zelin quarterfinal an lut dawn a, inelna hi February 5 a zawh tur a ni ang. Champion ram hi 2017 FIFA Confederations Cup khel turin an tling nghal dawn a ni.