Swansea mualah Arsenal laipui puak ring

Arsenal-in khualmualah manager thar Paul Clement enkawl Swansea City 4-0 in an sawp. Arsene Wenger-a naute hian point 44 hmuin league table-ah pathumna an ni rih a, hmahruaitu Chelsea nen an inkarah point riat a awm zel.

Inrinni zan inkhelah Gun­ners tan hian striker Olivier Giroud-a'n chawlh lawk hma deuhin goal hmahruai a khung. Alexis Sanchez-a ball cross Mesut Ozil-a'n a tauh per chu a awmna tur dik taka lo awm France international hian a khung.

French manager Wenger-a naute hian second half ṭantirah na takin an nawr nghal a, Jack Cork leh Kyle Naughton ten an mahni lamah an ti lut - heng goal pahnih hi Alex Iwobi thawhrah a ni. Hliam vanga Giroud thlak a nih hnuah Sanchez chu tlarhma laiah dah chhoh a ni a, Chile international hian hnai set sawt aṭangin an goal lina a khung.

Barcelona forward hlui Sanchez hian tun season Premier League khelh mekah goal 14 a khung tawh a, Chelsea striker Diego Costa nen goal khung hnem ber an ni mek. Hun tawp hma minute 10 a la awm tihah Sanchez hi Danny Welbeck-a'n a rawn thlak a - khelmual a chhuahsan dawnah a lungawi loh tih a hriat theih.

Gunners manager Wenger chuan, "Player zawng zawng hian thlak nih an duh lo a, a ṭhenin an lungawi lohna an lantir a, a ṭhenin an lantir lo. Hei chu thil thleng pangngai ve mai a ni, hetiang hre tur chuan tawnhriat ka ngah ve tawh - thil dang a awm lo," a ti.

Beiseina nung...

Gunners hian kum 2004 hnua a vawi khat nan league nomawi chawi leh ngei an tum a, an beiseina a la nung zel. Wenger-a naute hian December thla khan Manchester City leh Everton 2-1 ve ve in an hneh lo a, Janaury thlaah Bournemouth lakah point khat an hlawh chhuak hram bawk.

Ṭum dang ang lo takin Arsenal hian league kal meka goal chhuah hnem ber Swansea (49) hi an nawr buan buan lo! Goal khat an khung hnuah erawh na takin an nawr zui thung. Season tir lama inkhel tam lo Giroud hian tun hnaia match hnuhnung pangaah goal nga a khung tawh a, hun harsa kara an beiseina chhi nungtu pawimawh a ni.

Playmaker Ozil lo kirin inkhel a chawi nung a, tlar­hnungah Shkodran Mustafi leh Laurent Koscielny te an ding nghet bawk - keeper Petr Cech-a'n Wayne Routledge leh Gylfi Sigurdsson te goal khung tur a dan sak dan aṭangin rintlak a la nih zia a lantir bawk.

Swans an ral?

Swansea boss Paul Clement chuan, "Theihtawpin kan goal ven tum mah ila kan khawng tawk lo. Ka hmuh dan chuan second half-ah khan penalty hmu ngei tur kan ni," a ti.

Wales club defender Ki Sung-yueng chu Gunners box chhungah Laurent Koscielny chuan ti tlu mah se penalty pek a ni lo a, South Korea international hi tlu der nia ngain yellow card pek a ni thung.

Swansea hian match 21 khelh tawh aṭanga point 15 hmu­in league table mawng­phahah an awm mek a, an match khelh hmabak pathum - Liverpool, Southampton leh Manchester City laka insiamṭhat hi manager Clement a tan a awlsam lo ang.

Payet tel lohna Hammers

West Ham tan Andy Car­roll-a'n goal ropui a khung a, Sofiane Feghouli leh Manuel Lanzini ten goal khat ve ve khungin 3-0 in an chak.

London Stadium-a inkhelah kum 28-a upa Carroll hian minute 79-naah Michail Antonio cross chu mawt zetin a bicycle kick lut. England international Carroll chuan, "Khatiang goal khung tur khan hun rei tak chhung ka lo bei tawh a, ka goal khung zingah chuan a la ṭha ber," tiin a goal khung dan chu chhuang hle.

Hammers manager Slaven Bilic-a'n club tana khel duh tawh lo a tih Dimitri Payet chu team-ah telh a ni lo. France international tel lo mah se West Ham hian goal khung turin vawi 14 zet hun ṭha an insiam thei.

Croatian manager Bilic chuan, "Payet hi player ṭha tak a ni. Chutihrualin club hi mimal kutah ni loin thawhhona a innghat a nih zia chu zanin khan kan lantir a ni," tiin a sawi.

Inkhel dang

Inrinni zan Premier League inkhel dangah table mawngphaha talbuai mek Sunderland tan Jermain Defoe-a'n goal khung leh mah se an mikhual Stoke City lakah 3-1 in an tlawm. Stoke tan hian Marko Arnautovic chuan goal hnih a khung bakah Peter Crouch-a'n goal khat a tauh lut bawk.

Substitute Joey Barton goal khung hmangin Burnley chuan Southampton 1-0 in an hneh a, inkhel dangah Watford leh Middlesbrough te goal awm loin an inhnehtawk thung.