DeGale leh Badou inhnehtawk

International Boxing Federation (IBF) super-middle­weight champion lai James DeGale leh WBC super-middleweight champion kawnghren kawltu Badou Jack te chuan an champion kawng­­hren ve ve thapin nimin khan ring chhungah inhmachhawn mah se chak zawk awm loa puan an ni.

British boxer James DeGale hi judge pakhat chuan 114-112 in hnehna chantir mah se judge dang pahnihin 113-113 a an in­hneh­tawk tir avangin judge tam zawk thutlukna angin boxer pahnih hi in­hnehtawka puan an ni ta a ni.

Kum 30-a upa DeGale hian a benga hliam a tuar bakah a ha a bal bawk a, hetichung hian kum 33-a upa Badou Jack chu hmachhawn leh ngei a duh thu a sawi. British boxer chuan, "Hnehna chang turin ka bei ṭha tawkin ka hria, vawi 25 inhnek ka hmachhawn ta a, inhnek nawn leh ngei hi ka duh a ni," tiin a la cho salh salh hle.

May 2015-a Andre Dirrell a hneh hnua vawi thum lai a kawnghren humhim tawh boxer chuan sawi chhunzawmin, "IBF champion nichunga ka haw leh thei tur hi ka lawm a, chutihrualin WBC kawnghren ka hawn tel lo erawh chuan min ti hnual hle a ni," a ti.

Hetihlai hian Badou Jack promote tu Floyd Mayweather chuan, "Badou Jack hi super-middleweight a inhnek tur chuan a lian ta mah mah a ni. Light-heavyweight lama a kaisan theih nan hma kan la ang. Boxer pahnih inhneka chak zawk awm loa puan hi a mak a, boxing tan a ṭha lo. Keini chuan inhnek nawn lam pawh kan ngaihtuah lo," tiin a lungawi lo hle.