PBL champion Chennai Smashers

Pusarla Venkata Sindhu khelh­na Chennai Smashers chuan Mumbai Rockets 4-3 a hnehin a vawi khat nan Premier Badminton League nomawi an chawi a, Inrinni zana chak lo zawk Mumbai hi a zawnin pahnihna an ni ta.

Siri Fort Complex-a final khelhah team pahnihten match hnih ve ve hnehna an chan hnuah Chennai tan Tanongsak Saensomboonsuk chuan Ajay Jayaram 9-11, 11-7, 11-3 a hnehin a team a champion pui.

Damna Sindhu

Rio Olympic silver medalist PV Sindhu hi kumin PBL-ah Chennai Smashers tan damna a ni. Kum 21-a upa Sindhu hian final-ah hian world number 3 Sung-Ji Hyun chu harsatna nei loin 11-8, 11-8 in a hneh.

Chennai hian semifinal-ah league table-a hmahruaitu Awadhe Warriors chu 4-1 in an lo hneh tawh a, Hyderabad nula Sindhu hian final an luh theih nan world number 1 hlui Saina Nehwal chu minute 27 chhung lekin 11-7, 11-8 in a hneh tawh bawk. India rama hmeichhe badminton thiam ber chu Sindhu a ni chiang a, Olympic silver medallist hian amah aia tawnhriat ngah zawk Saina hi a hlau lo - trump match (chak lo se point khat paih theih a ni) atan a hmang. Hei chauh hi a ni lo, group match hnuhnung berah Saina hian chhuanlam siamin Sindhu a hmachhawn tawh lo bawk.

Kumin PBL-ah Sindhu hian match sarih a khelh aṭangin vawi khat chiah chak loh a nei a, ṭum ruk a chak tihna a ni! A hneh loh awmchhun chu Rio Olympic final-a a hneh loh Carolina Marin chiah a ni.

Intiat tawk

Chennai Smashers-in bul an ṭan ṭha zawk a, trump match khel nghalin Chris Adcock leh Gabrielle Adcock te chuan Nipitphon Puangpuapech leh Zeiba Nadiezda te ṭang dun chu 11-9, 11-6 in an hneh nghal. Indian shuttler Sindhu chuan awlsam takin Sung Ji Hyun a hneh leh bawk avangin chak zui chiang tura ngaih an ni hman.

Mumbai Rockets hi Hydera­bad Hunters hnehna final lut thei an nih avangin an inringtawk hle a, match hmasa pahnih an hloh hnuah pawh an zam lo. Trump match-ah Yong Dae Lee leh Nipitphon Puangpuapech te

ṭangdun chuan Chris Adcock leh Mads Pieler Koldingte lakah 10-21, 6-11 a hnehna an chan bakah Indian shuttler pahnih inkhelah H. S. Prannoy chuan 4-11, 11-8, 11-8 in P. Kashyap a hneh ve leh bawk.

Inkhel hnuhnung ber leh nomawi chawi tur chinfel­naah world number 11 Saensom­boonsuk chuan Indain tlangval Jayaram lakah game hmasa ber a hloh hnuah game hnuhnung pahnih la zawnin hnehna a chang.

PBL chu...

Badminton inelnaa lawmman sum fai tamna ber PBL season hi January 1 aṭang khan khelh niin team paruk - Mumbai Rockets, Awadhe Warriors, Hyderabad Hunters, Bengaluru Blasters leh Chennai Smashers te an inel.

Inelna hi league round hmanga khelh hmasak niin team tinte hi match nga hmang zelin an inkhel kual vek, chumi hnuah a sang paliin semifinal an khel. Team tin hian an inkhelh apiangin vawi khat 'Trump Match' an nei thei a, hemi match bika hnehna an chan chuan point hnih hmuin an chak lo a nih chuan point khat paih sak an ni thung. Match dang zawngah erawh a chakin point khat an hmu a, chak lohin point paih a awm lo bawk.

Team pahnihin trump match atan match inang an thlang thei a, match hrang a nih ṭum chuan trump match thlang lo zawk point hmuh dan chu a ngaiin a kal thung.