Didika hoin East Bengal an chak
East Bengal tan Lalrindika Ralte a lo kir a, Lunglei tlangval hian captain armband hreng chungin Kolkata club hi hnehna a chanpui nghal. I League nomawi chawi tum club hian DSK Shivajians chu khualmualah 2-1 in an hneh a, Aizawl FC laka an chetsual hnuin chetsual nawn an tum tawh lo.
I League champion Bengaluru-in Albert Roca hnuaia an league season hmasa berah Ashley Westwood hnuaia an record ropui kha chhawm nun tum - an mikhual kai thar Chennai City chu hun tawp lamah 2-0 in an hneh a, vawi hnih khelhah hnehna chang ve vein champion zia an chhuah leh der tawh.
Hei le East Bengal
East Bengal-in season hmasaah I League nomawi an chawi theih loh avangin coach Biswajit Bhattacharya an ban a, an coach hlui Trevor Morgan an lalut. British coach hnuaiah East Bengal-in I League-ah Aizawl FC hnehtawkin bul an ṭan.
Kolkata club-in a zawna hnehna chan zawh loh duh loin Willis Plaza, Thongkhosiem Haokip, Lalrindika Ralte leh Ivan Bukenya te inkhel bul an ṭan tir vek a, a tawpah an chak hram. Haiti international Wedson Anselme-a'n goal hmahruai a khung hnuah DSK tan Gouramangi Singh-a'n sut mah se Willis Plaza chuan East Bengal tan hun tawp dawnah chakna goal a thun.
DSK tan Lallianzuala Chhangte leh Jerry Mawihmingthanga ten inkhel bul an ṭan a, bench aṭangin Jerry Lalrinzuala a tlan lut bawk.
Bengaluru an duai lo
I League khel thar Chennai City-in beiseina sang tak nen Bengaluru FC lenchilhin hun rei tak chhung an chelh thei a, a tawpah Steelmen (Bengaluru sawina) ten
Roby Norales leh Chekiyot Vineeth te goal khung hmangin an mikhual team hi 2-0 in an hneh.
Bangalore club tan Sena Ralte leh Daniel Lalhlimpuia ten inkhel bul an ṭan a, Malsawmzuala chu substiute bench aṭanga tlan luhtir a ni bawk.
Chennai City coach Robin Charles Raja-a'n Minerva Punjab laka hun ṭha khawhraltu Lalnunmawia lakah rinna a nghat tawh lo a, a unaupa Malsawmfela nen bench-ah an ṭhu. MPL best player Sawmfela hi hun tawp hma minute thum la awmin luhtir a ni a, a thiam lantirna hun a nei lo.
Team Dinhmun
# Team Pld W D L GF GA GD Pts
1 Bengaluru FC 2 2 0 0 5 0 5 6
2 Mohun Bagan 2 2 0 0 3 0 3 6
3 East Bengal 2 1 1 0 3 2 1 4
4 Aizawl FC 2 1 1 0 2 1 1 4
5 Mumbai FC 1 1 0 0 1 0 1 3
6 Minerva Punjab 2 0 1 1 0 1 -1 1
7 Chennai City 2 0 1 1 0 2 -2 1
8 Churchill Brothers 1 0 0 1 0 1 -1 0
9 DSK Shivajians 2 0 0 2 1 3 -2 0
10 Shillong Lajong 2 0 0 2 0 5 -5 0