Suarez ropui zanah Messi record

Luis Suarez chuan Inrinni zan khan goal hnih khungin Las Palmas lakah Barcelona chu 5-0 in hnehna a chanpui a, goal khat khungtu Lionel Messi chuan Real Madrid legend Raul record a nihrual chiah bawk - Argentina captain hian La Liga-ah team hrang hrang 35 lakah goal a khung tling ta chiah a, team 35 laka Spanish La Liga-a goal khung thei dang chu Raul chiah hi a ni.

Liverpool striker hlui Suarez-a'n inkhel ṭan aṭanga minute 14 lekah goal hmahruai khung mah se goal dangin a zui lawk lo. Chawlh lawkah Barca player-ten goal khung uar tura fuihna an dawng a ni ngei ang, Messi, Suarez leh Arda Turan ten minute riat chhung lekin goal an inthun chhawk a, Aleix Vidal chuan minute 80-naah Barca tana a goal hmasa ber khung ve leh bawkin Luis Enrique-a nauten hnehna an chang chiang hle.

Buai ve lo Suarez

Luis Suarez-a'n season hmasaah Barcelona tan inelna hrang hrangah match 53 khelin goal 59 zet a khung a, Catalan club-in La Liga nomawi an chawi theihna kawngah match 35 khelin goal 40 tehmeuh a khung! Uruguayan striker hi FIFA FIFPro World XI-ah lang mah se tan tun hnaia tih chhuah UEFA team of the year-ah hmun a awm lo a, hei hian khawvel mak tih a hlawh.

Suarez-a'n UEFA lama a lan phak loh avangin ṭawngkam a nei lo a, khelmualah player ṭha a nihzia erawh a pho chhuak zel. Tun season-ah inelna hrang hrangah match 25 khelin goal 18 a khung leh der tawh a, league match 17-a khelhah goal 14 a khung tawh. Kar hmasa lawka Barcelona tana a goal 100-na khungtu striker hian Barca tan match 121 khelin goal 102 a khung tling ta der a, a nungchang vangin mi tam tak ngainat hlawh lo mah se Barcelona fan-te tan erawh a hlutna hmuh hmaih theih a ni lo.

Fak ṭul leh ṭhin Messi

Messi-a'n Barcelona-ah kum 2018 thleng contract a nei a, tun hnaiah contract thar ziak tura indawrna awm ṭhin mah se Argentina captain hi a hlawh a tam tham avangin chief executive Oscar Grau chuan contract thar ziahpui tur chuan sum hmuhna tur an dap a ṭul tur thu a sawi. Hetiang boruak karah hian Barca sporting relations head Pere Gratacos chuan Catalan club ropui chhan chu Messi vang chauh a nih loh thu a lo sawi chhuak zauh - a sawi fuh lo hle, Gratacos hi a hna aṭanga ban nghal a ni!

Lionel Messi boruak chheh vel kara buai lo ber erawh Messi tho a ni a, Las Palmas lakah a hmuhnawm lehpek hle. Freekick aṭangin chance hlauhawm tak tak a neih bakah a goal khung pawh player 'class' bik a nihzia pholanna a ni. Kum 29-a upa forward hian Barca tan tun season-ah goal 27 a khung tling leh der tawh - heti zat goal khung tura a match mamawh zat chu 24 chauh niin Barca tana a match hnuhnung pasarihah goal a khung vek!

Messi hian La Liga-a team a hmachhawn tawh zingah tun dinhmuna Spanish top division-a khel phak tawh lo Xerez, Murcia leh Cadiz lakah chiah goal khung loin team 35 lakah a khung tawh a, a record nihrual Raul chuan, "La Liga-a i goal khunglai hmuh reng mai hi a hlimawm takzet a ni," tiin Argentine forward hi a lo lawm.

Enrique thukhawchang

Barcelona manager Luis Enrique chuan, "Ball kan chan loh lai pawha ṭha taka kan khel thei khan minti lawm em em a ni. Las Palmas te ang team tum chuan theihtawp chhuaha nawr mai hi a fuh em em a, ball kan chan rualin chu chu kan ti thei nghal bawk a ni. Tlarhnung lam­ah kan inrem fuh em em a, he hmun­a ka lokal hnua kan game ṭhat ber ṭum ni hialin ka hria," a ti.

Catalan club hian Ningani zanah Real Sociedad nen Copa del Rey quarterfinal first leg an khelh lehnghal dawn avangin Enrique-a'n risk a la a, Andres Iniesta, Gerard Pique leh Neymar te a hahchawlhtir - Champions League khelh dawn vanga kaithar Alaves laka insiksawi vanga 2-1 a tlawm coach hi a chesual nawn lo. Brazilian forward Neymar aia lut Turan a khel ṭha takzet a, Turkey international hian 'cool' zetin Barcelona goal thumna a khung a ni.

Atletico an chak

Inrinni zan inkhel dangah Atletico Madrid an inlan ve bawk a, Diego Simeone-a naute hian an mikhual Real Betis chu 1-0 in an hneh hram. Atletico tan he inkhela goal awmchhun hi Nico Gaitan chuan minute 8-naa a khung a ni a, tun season-a a vawi li nana inkhel bul ṭan ve chauh Argentine midfielder hian a coach rinna a ti hlawhchham lo.

Atletico-in an khel ṭha lo chungin hnehna an chang a, Diego Simeone chuan a pawi­mawh ber chu result a nih thu sawi fiah nan Cristiano Ronaldo a hmang! Argentine manager chuan, "Result hi a pawimawh ber a nih leh nih loh in hriat duh chuan Ballon d'Or dawngtu hi en mai ta che u," a ti a, Ronaldo chu a mimal khelh ṭhat vang niloa team result vang zawka chawimawina dawngah a ngai.

Simeone chuan fan-te chu player-te chawk phur tawk loa a ngaih thu sawi nghalin, "He hmunah hian kum nga inkhelin kum nga chhung coach ka ni tawh a, he club hi ka hrechiang a ni. Fan-te thawm chhuah miah loa an awm ṭhup nia ka hriat hian min ti lungawi lo ṭhin a, player-te hian au phurtu an mamawh a ni," tiin a sawi.

Inkhel Results
Leganés 0 - 0 Athletic Club
Barcelona 5 - 0 Las Palmas
Atlético Madrid 1 - 0 Real Betis
Deportivo La Coruna 0 - 0 Villarreal