Ronaldinho a lokir dawn
Brazilian forward ropui Ronaldinho unaupa leh agent ni bawk Roberto de Assis chuan Brazil international hlui chu kuminah inkhel tura a lokir leh tur thu a sawi a, a unaupa khelhna tur chu South American club inelna sang ber Copa Libertadores-a inlan tal an nih tur thu a sawi bawk.
Kum 36-a upa Ronaldinho hian September 2015-a Fluminense a chhuahsan hnuah club mumal nei loin hun a hmang a, khawvel hmun hrang hrangah exhibition match khela zin kualin tunah erawh competitive football match khel turin a inpeih leh tawh.
Assis chuan, "Kum khat chhung zet khawvel hmun hrang hrang fanga kan zinkual hnuah inelna huang luhchilh leh a hun tawhin kan hria a ni. Kum 2017-a kan tum ber chu football khawvel luhchilh leh a ni a, Libertadores-a inlan phak chin club tan a khelh ka ring," tiin a sawi.
Ronaldinho unaupa chuan sawi chhunzawmin, "Club aiawh engemawzat nen indawrna kan nei tawh a, thil tih chian a nih hunah chuan club lamin thuchhuah an nei turah ka ngai," a ti.
Brazilian club Coritiba chuan Ronaldinho an duh thu tichiang tawh mah se Libertadores an khelh dawn loh avangin a pan a rinawm loh a, Uruguayan club ṭha Nacional chuan thawm an nei ring viau bawk.