Vawiin tlai dar 1:30 - NorthEast Derby Aizawl FC Vs Shillong Lajong

Aizawl FC coach Khalid Jamil chuan, Mizo club fan-te aiin I League club zinga supporter nei ṭha lo anga sawi ṭhin Mumbai FC ṭantute an ṭha zawka a ngaih thu a sawi! Mumbai FC coach hluiin a ngaihdan a thlak theih nan Mizo mipuite Mizo club tan an pen chhuah a ṭul ang.

Vawiin chhun dar 1:30 hian RG Stadium, Mualpuiah NorthEast Derby khelh a ni dawn. Aizawl FC-in point la hmu lo Shillong Lajong an hmachhawn dawn a, inkhel pawimawh a ni.

Point la hmu lo
Shillong Lajong-in an match hmasa berah Bengaluru (0-3) an hmachhawn a, Aizawl an rawn pan hmain Kolkata-ah Mohun Bagan (0-2) lenchilh lehin an chak lo ve ve. Thangboi Singto hote hian chak an la nei lo a, amaherawhchu an hneh loh hi I League champion leh Federation Cup champion an ni a, dah hniam ngawt chi an ni lo.

Lajong hi an point hmuh zat aṭanga thlir theih an ni lo a, Aizawl FC ang thoin foreigner pali an nei tawh.

Lajong hi Bengaluru an khelh ṭum aiin Mohun Bagan an hmachhawnin an khel ṭha tawh zawk a, khualmuala an match thumnaah player an inhre chiang lehzual tawh ang.

Goal la khung lo
Shillong Lajong hian goal an la khung lo a, Aizawl FC pawhin an la khung bik lo!

Mizo club hian East Bengal leh Minerva Punjab an hmachhawn ṭumin goal hnih an 'nei' a, 'own goal' ve ve a nih avangin Aizawl FC player zingah goal khung an la awm lo.

Aizawl FC coach Khalid Jamil chuan, "Lungngai suh u. Ka player-te hian goal an khung em em ang. Tlar hmaah pawh player ṭha tak ka nei a - Kamo, William leh Nunpuia te hi forward ṭha tak an ni a, Alfred hi midfield-ah chhawr mah ila striker-a khel thei a ni," tiin goal khung kawngah hlauhthawnna a nei lo.

Mi thar?
MPL3 best player Lalram­chullova a dam tawh a, Armed Veng tlangval hian khelhna hmun a chang ang em tih hriat la ni lo mah se AFC boss Khalid-a'n player a thlak danglam tur thu a sawi.

Aizawl FC coach Khalid chuan, "Match hnih kan khel tawh a, insiksawi ve reng hi a ṭul a ni. Lajong kan tum hunah player pahnih pathum chu starting eleven-ah tihdanglam a ni ang," tiin player ngai reng a chhawr loh tur thu a sawi.

Mipui chu
Khalid Jamil hian I League-a a hun tam zawk Mumbai FC-ah a hmang a, Mizo aia Mumbaikar a ngaina a nih pawhin dem thei a ni lo.

Aizawl boss chuan, "Kan supporter-te min auh phur danah ka lawm a, sawisel tur ka nei lo. Amaherawhchu Mumbai FC-a ka awm laiin ṭantu kan nei ṭha zawk," tiin Minerva Punjab an hneh zawhah a sawi.

Mizo mipuiin Mizo club an ṭan a pawimawh a, Liberian forward Alfred Kemah Jaryan pawhin mipui pawimawhna a hrechiang hle. AFC captain Alfred chuan, "Mipuiin min auh phur hian tha nasa tak kan neih belh a, ṭha zawkin kan khelh theih phah ṭhin. Lajong kan hmachhawn huna Mizo mipui ṭawiawmna ṭha zawk ka beisei a ni," tiin a sawi.

Aizawl FC = Lajong
Kum 2016 chhung khan Aizawl FC leh Shillong Lajong te vawi thum an inkhel a, vawi khat ve ve chakin vawi khat an inhnehtawk. February 13, 2016 khan Aizawl FC leh Shil­­long Lajong te RG Sta­dium, Mualpuiah an in­hmachhawn a, mualneitu hian Bengali coach Jahar Das-a hnuaia an match hma­sa ber khelin goal a lut lo.

Mizo club hian Lajong lakah point thum an hmuh theih loh avangin an dinhmun chhe tawh sa chu a chhiat belh a, amaherawhchu Kolkata club lian Mohun Bagan meuh an hneh chhoh avangin an phur thar hle. Champion lai Mariners hneh zawhah Aizawl FC-in Shillong an tlawh a, point thum beisei luatah point khatmah an hmu lo.

April 1, 2016-a La­jong leh AFC inkhelh ṭum hian Mizo tlangval Samuel Lalmuanpuia chu Lajong chhandamtu a ni a, Zemabawk North tlangval Samuel hian goal khat khungin Fabio Henrique Pena-a'n goal hnih a khung bawk. Brazilian forward Pena hi tun ṭuma Aizawl FC hmachhawn tur Lajong squad-ah telh a ni.

Shillong-ah Thangboi Singto hote an chak avangin Aizawl FC an tla a, I League khel leh turin AIFF khawngaihna an mamawh phah ta hial. Mizo club hian Lammualah Lajong lakah phuba an la tawh a, nikum I Day Football semifinal hmuh­nawm takah Aizawl FC-in Albert Zohmingmawia goal hnih leh Bright Middleton Mends-a goal hmangin Shillong Lajong chu extra time-ah 3-2 in an hneh a, nomawi an chawi zui bawk.

I Day Football-a AFC hneh Shillong Lajong kha chu tuna mite hi an ni lo a, chuvangin phuba tak tak an la duh a nih chuan I League-ah ngei an lak a ṭul ang. NorthEast club pahnih hian India rama league sang ber khel turin player ṭha zawk an lalut a, Lammuala NorthEast Derby hmuhnawm tak ai khan RG Stadium-a NorthEast Derby khel tur player an ṭha zawk.

Lajong-ah Mizo pali
Shillong Lajong-in I League khel tur hming 27 an thehluh zingah Mizo paruk an awm. Tun ṭumah hian Mizo pali Jacob Lalrawngbawla, Zodingliana Tochhawng, Isaac Vanmalsawma leh Samuel Lalmuanpuia te an rawn zin a, Joseph Lalfakzuala leh Lalram­muana te an tel ve lo.

Coach Thangboi Singto hian Aizawlah Benga­luru FC leh Mohun Bagan hmachhawn tura a hruai player 19 bawk a rawn chhawm a, matchday squad-ah hian player 18 ziah luh theih a ni. Mizo pali zingah Samuel Lalmuanpuia la inlan ve lo mah se Zema­bawk North tlangval Samuel hi season liam ta I League match pawi­mawha Aizawl FC lama goal khungtu kha a ni a, RG Stadium-a a inlan a nih pawhin a mak lo ang.

Lajong boss Thangboi chuan, "Mizo player chu a inlan dawn ngei a, tu ber nge khel ang tih ka sawi thei lo a, ka sawi theih chu tun dinhmuna khel ṭha an lut ang tih hi a ni. Ka player zingah duhsak bik ka nei lo a, AFC kan hmachhawn zawh hian Shillong-ah match nga kan khel dawn. Tun ṭuma rawn zin lo Joseph leh Rammuana te pawhin midang ang bawkin khelhna chance an nei ang," tiin press conference-ah sawi.

Yuta a lo let
MPL4-a Aizawl FC champion puitu Yuta Kinowaki chu Aizawlah a rawn kir a, tun ṭum­ah erawh Japanese midfielder hian Shillong Lajong jersey a ha tawh thung dawn. AFC mid­fielder hlui hian match hnih khelh tawhah inkhel bul a ṭan ve ve.

Shillong Lajong hian foreigner neih tur zat pali an nei kim tawh a, Romanian defender Dan Gelu Ignat-a'n captain armband hrengin Manipuri defender Ching­lensanna Singh nen an in­kawp. Tlarhmaah Bra­zilian forward Fabio Henrique Pena leh DSK Shivajians aṭanga an lakluh Cameroonian forward Aser Pierrick Dipanda Dicka te an inkawp bawk.

Lajong boss chuan, "Yuta hi professional a ni a, AFC hi a club hlui ni mah se ṭha takin a khel ang. Dan Gelu Ignat hi Romanian zinga I League khel hmasa ber a ni hial ang. Atan pawh insiamrem a har a, amaherawhchu Bengaluru nen kan inhmachhawn ṭum aiin Bagan nen a khel ṭha zawk a, hmasawn zawng zela a kal ka bei­sei," tiin a sawi.