Everton lakah Pep leh City an zawr

Pep Guardiola enkawl Manchester City chu Everton khelmualah 4-0 in an zawr a, inkhelh zawhah Spanish manager Pep chuan an tan Premier League nomawi a hlat tawh thu a sawi! League match 21 khelh tawh aṭangin City hian point 42 an hmu a, hmahruaitu Chelsea an phak lohna chu point 10 a ni der tawh.

Barcelona leh Bayern Munich manager hlui Guardiola-a'n sawiselna nasa tak karah a naute a khelhtir dan a la thak duh lo. Man City hian ball possession 71% zet an chang a, hetichung hian goal an khung lo! Toffees erawhin goal khung turin vawi ruk chiah City goal hmaah pet mah se vawi li a lut.

Goodison Park-a inkhelah Everton tan Romelu Lukaku leh Kevin Mirallas ten goal khungin 2-0 in hma an hruai pui. Ronald Koeman-a naute hian goal zawna an pet hmasak pahnih chu goal-ah an chantir thei.

Tom Davies chuan Everton tan a vawi hnih nan league-ah inkhel bul a ṭan a, kum 18-a upa midfielder hian an goal thumna a khung. Hun tawp dawnah pound maktaduai 11 a an lak thar Ademola Lookman chuan City keeper Claudio Bravo kapkarah an goal lina a khung ve bawk - Everton goal hnuhnung ber khungtu pawh hi kum 19-a upa chauh a la ni.

City beisei a tawp?

League match hmasa vawi 10 an khelhah City hian point 23 hmuin hmahruaitu an ni a, match 11 dang an khelh leh hnuah an tan nomawi chu ban phakah a awm tawh rih lo.

Captain Vincent Kompany chu hliam vangin a inkhel mumal thei lo. Tlarhnung laiah John Stones leh Nicolas Otamendi te an inkawp ṭhin. Everton laka an goal chhuah hmasa berah defender Gael Clichy-a'n a hna a tlin tawk lo a, pound maktaduai 47.5 man Stones chu a awm lohna turah a awm lo bawk - England international hian a ven tur Lukaku a veng lo.

Guardiola-a'n Joe Hart a chhawr duh lo a, a hriatchian sa Claudio Bravo a lalut. Chile international goalkeeper hian beisei a phak lo. City hian tun hnai an match hnuhnung pariatah an goal zawnah shot vawi 22 an hmachhawn a, heng zinga 14 zet chu Barcelona keeper hlui hian a chhuah - City tlar­hnungin inrintawkna an nei lo a, an buai takzet.

Kum 45-a upa Guardiola chuan, "Point 10 hi chu a tam tawh hle. Tunah hian kan dinhmun a ṭha lo hle a, league table hi chu kan theihnghilh ngam a ngai hial a ni," tiin an tan league nomawi chu ban phakah a awm tawh rih loh thu a sawi.

Koeman-a thluak

Everton manager Koeman-a'n FA Cup-a Leicester City an hneh loh hnuah a naute chu 'harh' turin a ti a, hei hian rah ṭha a chhuah nghal. Barcelona tana a lo khelhpui tawh Pep hmachhawn tur a ni nachungin midfielder Davies chu inkhel bul a ṭantir ngam a, a ti sual lo.

English rawlthar Davies hi an goal pathumah a inrawlh vek a, goal khat a khung bawk. Team pahnih midfielder zinga tlan tam ber niin inkhelh chhung zawngin khelmual chhungah a langsar tluan chhuak zak.

Defender Mason Holgate hi kum 20-a upa chauh la ni mah se a rintlak tih a chiang a, tawnhriat ngah Leighton Baines chuan hun pawimawhah Raheem Sterling goal khung tur a dan sak bawk. Toffees hian Manchester United aṭanga an lak thar Morgan Schneiderlin chu inkhel chawhnu lamah an tlan luhtir a, a club thar tan a match hmasa bera goal khungtu Lookman chu an lawmna ti zualtu a ni ngei bawk ang.

Everton boss Koeman chuan, "Hun pawi­mawhah goal kan khung thei a, chawlh­lawk hnuah kan khung zui bawk avangin an tan chuan a harsa ve hle ang. Kan goal venhim dan leh kan nawr dan thleng khan a ṭha em em a, vawiin kan inkhelah chuan sawisel tur ka hre lo," tiin a sawi.