Juventus an chak lo

Fiorentina chuan Nikola Kalinic leh Milan Badelj te goal hmangin Serie A hmahruaitu Juventus 2-1 in an hneh a, point 30 hmuin league table-ah pariatnaah an invawrh chho.

Pathianni zan inkhelah mual­neitu Fiorentina-in inkhel bul ṭan ṭha zawkin minute 37-naah Blackburn forward hlui Kalinic-a'n goal hmahruai a khung a, second half-ah Badelj chuan an goal hnihna a khung leh bawk.

Champion lai Juve tan khaw­vela player manto pathumna Gonzalo Higuain chuan goal khat khung ve mah se khualmualah point an hlawh chhuak zo lo.

Inkhel dangah league table-a pahnihna Roma chuan Belgium midfielder Radja Nainggolan goal khung hmangin Udinese 1-0 in an lo hneh ve tawh bawk a, an inthlauhna chu point khat chiah a ni mah se Juve hian match khatin an la khel tlem zawk.

Massimiliano Allegri kaih­hruai Juve hian kumina an match hmasa pahnihah Bologna leh Atalanta te hneh mah se Fiorentina lakah erawh an talbuai tih phat rual a ni lo. Fiorentina hian goal khung turin Juve goal lamah vawi 17 zet an pet a, Turin club-in tun season league match an khelh bika goal shot an hmachhawn hnem ber ṭum a ni hial.

Juve manager Allegri chuan, "January thlaah nomawi chawi mai theih a la nih loh zia kan hre chhuak thar chiang hle. Team tin hian Juve an hmachhawn a nih chuan an theihtawp an chhuah ṭhin tih pawh kan hre nawn leh a, May 28 a thlen hma loh chu inkhel zawng zawngah theihtawp kan chhuah zel a ngai," tiin a sawi.

Inkhel Results
Cagliari 4 - 1 Genoa
Lazio 2 - 1 Atalanta
Sampdoria 0 - 0 Empoli
Sassuolo 4- 1 Palermo
Napoli 3 - 1 Pescara
Udinese 0 - 1 Roma
Fiorentina 2 - 1 Juventus