Andy Murray a chak nghal

Kumina Grand Slam hmasa ber Australian Open chu nimin zing aṭang khan khelh ṭan a ni a, world number 1 Andy Murray chuan a match hmasa berah Illya Marchenko hnehin second round a lut.

Melbourne Park-a inkhel­ah Murray hian world number 95 Marchenko lakah awlsam takin hnehna a chang bik lo. Darkar hnih leh minute 48 zet an inbeih hnuah 7-5, 7-6 (7-5), 6-2 in hnehna a chang. Kum 29-a upa Muray hian Australian Open final vawi nga a khel tawh a, a la champion lo thung.

Grand Slam vawi thum champion tawh Murray hian a match hmasa berah hian ace vawi 10 neiin unforced errors

ṭum 27 a nei thung. Champion turin theihna a nei tih a inkhel aṭangin a chiang a, chutihrualin nomawi chawi tur erawhin a thawhrim a ngai dawn.

Inkhel dangah world number 5 Kei Nishikori chuan a match hmasa berah fiah­na hautak a hmachhawn nghal. Japan tlangval hi An­drey Kuznetsov nen darkar thum leh a chanve an inhmachhawn hnuah 5-7, 6-1, 6-4, 6-7 (6-8), 6-2 in a chak hram. Kum 27-a upa Nishikori hian second round-ah chuan Jeremy Chardy a hmachhawn leh ang.

Seeded 10-na Tomas Ber­dych a vannei. Mel­bourne-a semifinal vawi hnih lo khel tawh Berdych hi first round-a a hmachhawn Luca Vanni lakah set khatna 6-1 in a la a, Vanni hi hliam vangin a inkhel zui thei lo. Inkhel dangah seeded pasarihna Marin Cilic chuan set hmasa pahnih a hloh zet hnuah world number 278 Jerzy Janowicz chu 4-6, 4-6, 6-2, 6-2, 6-3 in a lehthal.

Hmeichhe lam

Australian Open khelh ṭan niah beisei loh result kan hmu nghal. Hmeichhe seeded palina Simona Halep chu seeded chang phak zinga tla hmasa ber a ni.

Romanian nula Halep hi nikum khan first round-ah a lo tla tawh bawk a, kuminah beiseina sang tak nen inelna hmachhawn mah se Shelby Rogers lakah 6-3, 6-1 in a chak lo. Inkhel dangah Venus Williams chuan 7-6 (7/5), 7-5 in Kateryna Kozlova a hneh ve thung.

Kum 37-a upa Venus hian kum 1994 aṭang khan professional match a khel tawh a, hemi kum hian tun ṭuma a khingpui Kozlova hi a piang ve chiah.

Grand Slam vawi sarih champion tawh Venus chuan, "Ban na vangin ka chawlh a ngai a, chumi hnua ka match hmasa berah hnehna ka chang thei nghal hi ka lawm hle," tiin a sawi.