India tan King Kohli

Pathianni khan India leh England chuan ODI series match nga an khelh tura match hmasa ber an khel a, wicket thumin India-in hnehna an chang - India tana player langsar ber chu run 122 siamtu Virat Kohli niin run 120 siamtu Kedar Jadhav-a'n a pui ṭha viau bawk.

Pune khawpuia inkhelah England an bat hmasa zawk a, over 50-ah run 350 siamin mi pasarih chiah an hloh. England tan Jason Roy (73 runs) leh Joe Root (78 runs) te an chet ṭhat avangin India tan target um huhphurawm tak a ni - mah se India-in England neih loh an nei a, chu chu Virat Kohli a ni.

India-in run 63 an siamin wicket li lai hloh tawh mah se captain nichunga ODI a khelh hmasak berah Kohli-a'n tlawm a duh lo a, ball 105-ah run 122 tehmeuh a vaw chhuak! India tan a vawi 13 nana ODI khel ve chauh Kedar Jadhav-a'n Kohli tan puitu hna a rawn thawk bawk a, kum 31-a upa batsman hian ball 76 lekah run 120 vaw chhuakin a khel ṭha hle. India-in over 48.1 an thlen meuh chuan run 356 vaw chhuakin wicket sarih an hloh a, ODI chanchina run um hlawhtling ber palina ni turin hnehna an chang.

January 19-ah team pahnih hi an in hmachhawn leh ang.