Point khat hmu ve ve Reds aia lawm zawk United

Manchester United khelmualah Liverpool an lenglut a, inkhel ngaihven hlawhah chak zawk awm loin an inṭhen - inkhel pumpui thlira chak phu zawk chu United ni mah se hun tawp hnaih lama si phurh suttu zawk an nih miau avangin point khat ve ve hmua lawm zawk chu Manchester United an ni.

Inkhel ṭan aṭanga minute 29-na lekah Paul Pogba chu khawvela player manto ber tiha mawi loin a handball a, penalty a chawi. Reds tan James Milner a rawn pen chhuak a, English midfielder tawnhriat nei ngah hian Old Trafford-a inkhel boruak sangah harsatna nei loin a khung.

United-in an si phurh sut tur­in minute 84 an nghah thlen a ngai a, Zlatan Ibrahimovic chuan Marouane Fellaini ball tauh per chu a khung. United-in nawr zui mah se hun a tam tawk tawh lo a, team pahnih hi 1-1 in an ṭin.

Manto Pogba a to lo!

Manchester United-in inelna hrang hranga an match hnuhnung pakuaah hnehna an chang vek a, Jose Mourinho naute kaltluanna kawnga player thawhhlawk ber pawl chu Pogba niin an kaltluang lai tawpna kawnga mawhphurtu ber pawh pound maktaduai 89 man midfielder tho hi a ni!

French midfielder hian Dejan Lovren nen an innek buaina lamah handball vangin penalty a chawi a, inkhel boruak sanga 'world class' midfielder chet dan atan chuan ho tak a ni - hei mai a la ni lo cheu, kum 23-a upa midfielder hian first half tir lamah a hun ṭha neih chu holam takin a khawhral bawk.

Pogba chetsual kara fak phu erawh sawisel hlawh ṭhin Fellaini a ni. Belgian midfielder hi Jose Mourinho-a'n 'long ball' hmanga Reds tlarhnung a run tir hnuah tlan luhtir a ni a, a hnathawh tur dik tak a thawk. Liverpool tlarhnunga player inremkhawm karah Everton midfielder hlui a zuang sang ber a, a post tauh per lo changtu Ibra-a'n mawi takin a tauh lut.

Mourinho chuan, "Fellaini hi a

ṭhatna leh ṭhat lohna kan hriat a ngai a, a thiamna hi kan hmuh thiam a ngai a ni," tiin a player chungchang a sawi nghal.

Chul thei lo Ibra

Ibrahimovic-a'n kum 35 a tling tawh a, striker tam zawk tan chuai hun a ni tawh. Swede striker erawh ama ṭawngkam 'Uaiin ṭha mi ang mai ka ni. Ka upa tulh tulh a, ka ṭha tulh tulh a ni' tih ang maiin chuai lam a pan hleithei lo - Liverpool lakah khel ṭha fal lo mah se United 'chhanhimtu' a chhiar loh theih a ni lo.

Premier League-a pan tirha hlawhchham tura mi tam takin an sawi striker hian tun season inelna hrang hrangah match 29 khelin goal 19 a khung tling der tawh a, league-ah goal 14 khungin Diego Costa leh Alexis Sanchez te nen goal khung hnem ber an ni mek.

Paris Saint Germain striker hlui hian Premier League-a a match hmasa 20-ah goal 14 khungin Manchester City striker Sergio Aguero, England legend Alan Shearer leh Coventry City forward hlui Micky Quinn te nen huang khatah an awm.

Reds chhandamtu Mignolet

Liverpool-in Old Trafford-a Manchester United an chelhna kawngah player fak phu an awm a nih chuan Simon Mignolet a ni ang. Belgian goalkeeper hian Ibrahimovic free kick pet chu ṭha zetin a dan sak a, Henrikh Mkhi­taryan hun ṭha neih chu engmah lo maiah a chantir bawk.

Reds boss Klopp-a'n tun season-ah goalkeeper duhthlan tur Mignolet leh Lori Karius a nei a, season tirah Karius inhliam vangin Mignolet inlan ngun mah se Karius dam hnuah German keeper a chhawr ngun zawk. Mahse, Mainz aṭanga a lakluh keeper hi West Ham leh Bournemouth laka a chetsual hnuah Mignolet-ah bawk rinna a nghah chhunzawm a, game boruak sangah Klopp-a'n thutlukna a siam sual loh zia a lang.

Boruak sang

Manchester United leh Liver­pool inkhelah beisei angin game quality sang lo mah se a boruak sanna erawh a danglam phah lo. Mignolet chet ṭhat zanah Liverpool-in chance an nei tam lo a ni bik lo - Roberto Firmino pet chu David de Gea-a'n ṭha takin a dan sak a, Georginio Wijnaldum-a'n Ibra goal khung hnua a hun khawhral chu chhuanlam siamna atana ho khawpin a pet goal lo.

United substitute Wayne Rooney chu James Milner laka a foul vanga 'red card' a chawi loh avangin a vannei takzet a, hetihrual hian Firmino chu amah pawttu Ander Herrera a kut pahnih thawha a nam thluk vanga yellow card chiah a chawi chu a vannei takzet bawk.

Mourinho a ngeiawm!

Inkhelh zawhah Manchester United manager Jose Mourinho chuan a dan pangngai tein ṭawng­kam ngeiawm a hmang leh ta. Portuguese manager chuan, "Second half-ah khan ka vei lam ka hawi nasa lutuk a, kawr eng ha hlir ka hmu bawk nen ka nghawng hi a kham vek a ni," tiin Liverpool chu defensive game an khelh avangin a kap.

Anfield-a defensive game khela Liverpool a hnehtawk vanga sawisel hlawh manager chuan sawi chhunzawmin, "Vawiin khan goal khung tum team chu keimahni kan ni a, Reds-in an goal an veng thung. Anfield-a ka game plan sawiseltute khan enge sawi tur an neih ka hre chak khawp mai. Zanin kan khelh dan kha nuam ka ti a, point thum kan hawn lo erawh a pawi a ni," a ti.

Mourinho chuan Liverpool chu team fing tak an nih thu sawi nghalin, "Kan theihna sang ber kan pholang lo a, Liverpool lamin an pholang thung. Mahse kan huaisen a, kan paukhauh a, a tawp thlengin theihtawp kan chhuah a ni. Liverpool khan football kalphung an man tlat a, hun tawp hnaih lamah khan chesual thei an ni tih inhriain fing takin an khel a ni," tiin Reds chu goal venhim lam ngaihtuah zawkah a puh.

Klopp lawm a kim lo

Liverpool-in Africa Cup of Nations khelh vangin an player pawimawh Sadio Mane an chhawr thei lo a, AFCON khelh duh loh vanga hrem hmabak defender Joel Matip khelh tir phal a nih leh nih loh chungchangah thuchiang a awm hman loh avangin an chhawr ngam lo a, hliam vangin Nathaniel Clyne aiah kum 18-a upa Trent Alexander-Arnold chuan inkhel bul a ṭan bawk.

Klopp chuan an ṭhat dan bera an khelh loh thu sawiin, "Kan first eleven kha en ula, Old Trafford-a point khat hlawhchhuah hi inkhelh hma kha chuan kan lawm tawk viau ang. Mahse, ka naute khelh dan en chuan point thum kan hlawh chhuak zo lo hi a lungawi thlak loh a ni," a ti.

German coach chuan sawi chhunzawmin, "Inkhel tawp lamah United khan long ball hmangin Fellaini leh Ibra an zawng a, kan tan chuan a harsa a ni. Manchester United-a draw result hi hahdam taka pawm chi ni mah se minute 98 kha kan thlirkir chuan chak kan phu a ni," tiin a lungawi zo lo.