Real Madrid kaltluang titawptu Sevilla

Zinedine Zidane enkawl Real Madrid match 40 chhung zet hneh loh nei lo a an kaltluang chu a tawp ta! Pathianni zan khan La Liga hmahruaitu Real hi an elpui Sevilla khelmualah 2-1 in an tlawm a, league nomawi inchuh boruak a nun thar phah hle.

Ramon Sanchez Pizjuan Stadium-a inkhelah Real Madrid tan hian Cristiano Ronaldo chuan a club tan a vawi 56 nan penalty a chhuih lut. Portugal captain hian Real hranghlui Hugo Sanchez record nih rualin La Liga-a penalty chhuih lut hnem ber an ni.

Team hnuaisen Sevilla an beidawng lo a, a tawpah an huaisen rah an seng. An khingpui te lakah hun tawp dawna goal khung fo Real Madrid defender Sergio Ramos-a'n ṭum dang ang lo takin anmahni lamah a ti lut a, substitute Stevan Jovetic chuan hun pek belhah chakna goal a khung zui bawk.

Real hi nikum May thla hnua an chak loh lehna hmasa ber a ni. Zidane-a naute hian La Liga club zinga hneh loh nei loa kaltluang rei ber record an siam hun chhung hian mikhual tana inkhelh harsatna hmun Nou Camp, Etihad Stadium leh Signal Iduna Park-ah te an leng lut a, heng match harsa pathumah hian Ramos-a'n goal pawimawh a khung vek - Sevilla lakah erawh Spanish defender hi a chesual thung.

France legend Zidane-a'n nikum January 4 khan Real Madrid a enkawl ṭan a, a season khatnaah Champions League nomawi a chawi nghal. Real manager a nih hnuah hian vawi thum chiah chak loh a la nei - Atletico Madrid, Wolfsburg leh Sevilla te chiah hi a ngam lo chu an ni; Barcelona lakah a la tlawm lo!

Ronaldo leh penalty

Manchester United forward hlui Ronaldo hian kum 2009-a Real Madrid a zawm hnuah Spanish club tan hian inelna hrang hrangah match 369 a khelh tawh aṭangin penalty vawi 80 a pet tawh a, heng zinga 69 chu goal-ah a chantir - vawi 11 a pet goal lo thung.

Sevilla nen an inkhel ṭum hian goalkeeper Sergio Rico-a'n Dani Carvajal a tih tluk vanga a penalty chawi chu minute 67-naah a khung a, an record an chhawm nung dawna a lan hnuah an zuih ral ta a ni.

Minute sarih chu

Hun tawp nan minute nga chiah a awm tawh a, mikhual Real-in goal khat faiin hma an la hruai. Sevilla tana Pablo Sarabia free kick pet chu Ramos-a'n tauh chhuah a tumna lamah an mahni lamah tilut palh.

Kum 30-a upa Ramos hian Copa del Rey last 16-a a club hlui an hneh ṭuma a goal khung a lawm (celebrate) avangin a hmangaih hmasa Sevilla fan-ten an lawm lo a, an intawn lehna hmasa bera a chesual zui hi Sevilla ṭantute duhthusam a ni zawk hial ang!

Inkhel a la tawp lo, hun pek belhah Manchester City for­ward hlui Jovetic chuan box pawn aṭangin an chakna goal a khung. Inter Milan aṭanga loan hmang an lakluh Jovetic hian kar khat chhungin a club tan goal hnih a khung der tawh.

Nomawi inchuh

Kum 2012 hnuah Real Madrid hian La Liga nomawi an la chawi leh lo a, tunah hian match 17 an khelh tawh aṭanga point 40 hmuin hmahruaitu an ni mek a, an hnuaia awm Sevilla leh Barcelona te aiin match khatin an khel tlem zawk bawk.

Sevilla-in league-a hlawh­tlinna an chan hnuhnung ber chu kum 71 liam ta daih tawh kha a ni. Kuminah manager thar Jorge Sampaoli kaihhruaina hnuaiah beiseina an nei leh mek.

Copa America-a Chile cham­pion puitu Argentine manager kaihhruaina hnuaiah Sevilla hian league match 18 an khelh tawh aṭangin vawi 12 hnehna an chang a, point 39 hmuin an chunga awm Real nen an inkarah point khat chiah a awm mek - an hnuaiah hian point 38 hmutu Barcelona an la awm bawk.

Eng nge an sawi?

Real Madrid manager Zidane chuan, "Minute 85 chhung chu ṭha takin inkhel kan thunun thei a, a tawp lam minute nga chhung lek kan mutthluk zeuh kan tuar. Kan result hi kan pawm thiam tur a ni a, chutihrualin kan inkhelh lehpekah chakna min petu atan kan hman a pawimawh," tiin a sawi.

Sevilla manager Sampaoli chuan, "Player ṭha tak tak awm khawmna Real Madrid kan hneh thei a, league hmahruaitu lakah point thum kan hmu thei a nih chuan beisei kan nei sang ngam tur a ni. Ka nauten an khel ṭha takzek a, hetianga ṭha hian an khelh chhunzawm theih pawh ka beisei," a ti.