Churchill ngam loh Mumbai

Mumbai FC coach Santosh Kashyap-a'n season tawpah a sang pathum zinga tel an tum thu a sawi chu a nauten khelmual chhungah chetzia hmangin an lantir zel a, Pathianni zan khan Churchill Brothers chu 2-1 a hnehin league match vawi hnih an khelhah point ruk an nei ta.

Churchill Brothers tan Brandon Fernandes chuan inkhel ṭan aṭanga minute 4-na lekah goal hmahruai khung mah se Victorino Fernandes chuan Mumbai tan chawlhlawk hmain an si phurh sutna goal a khung.

Mumbai-in minute 84-naah penalty hmangin chakna hun remchang nei mah se substitute Karan Sawhney pet chhe zet chu Goan club keeper Priyant Singh tan dan a harsa lo. Mahse injury time-ah Sawhney a inlar a, Bengaluru striker hlui hian a tihsual thup nan an chakna goal a khung.

Maharashtra club tan Mizo awm­chhun Lalchhawnkima'n inkhel bul a ṭan a, Champhai tlangval hian inkhel pahnih an hmachhawn tawhah minute 90 a khel tling ve ve a ni.