Mahrez leh Mane langsar nghal

Africa Cup of Nations khelh mekah Senegal chuan an match hmasa berah Tunisia chu 2-0 in an hneh nghal. Group B inkhel dangah Riyad Mahrez goal hnih khung hmangin Algeria chuan Zimbabwe 2-2 in an inhnehtawk pui bawk.

Pathianni zan inkhelah Leicester winger Mahrez hian goal hnih khung mah se an khingpui Zimbabwe tan Kudakwashe Mahachi leh Nyasha Mushekwi ten an khung ve miau avangin point khatah an lungawi a ṭul.

Senegal tan pawh Premier League player bawk a langsar. Liverpool hmatawng Sadio Mane chuan penalty chhuih lutin an ram hma a hruai pui a, Kara Mbodj-a'n an chak nemngheh nan a tauh lut bawk.

Chak lo zawk Tunisia hian kum 2004 khan a vawi khat nan Africa Cup of Nations nomawi hi an lo chawi tawh. Hetih lai hian Senegal erawh payer langsar nei chungin an la champion lo, kum 2002 final khan Cameroon chu penalty-ah an hneh lo a ni.

Kuminah Senegal hian Napoli centre back Kalidou Koulibaly bakah West Ham player Kouyate leh Everton midfielder Idrissa Gueye te an nei a, anni bakah hian pound maktaduai 34 man Mane an la neih bawk avangin beisei an nei sang hle.