NorthEast Derby Shillong chungah Aizawl

Aizawl FC-in I League a point la hmu lo Shillong Lajong FC chungah zahngaihna an lantir lo a, nimin chawhnua inkhelah Mizo club-in Shillong club 2-1 in an hneh.

AFC tan Lalruatthara leh Jayesh Rane ten goal an khung a, Lajong lamin hun tawpah Yuta Kinowaki hmangin penalty khung mah se result a danglam phah lo.

Syrian midfielder Mahmoud al Amna chu RG Stadium-ah match zawnin man of the match-a thlan a ni a, inkhelh ṭan tirha penalty dangtu Aizawl FC keeper Albino Gomes hnathawh hmuh hmaih a thiang lo.

Kamo tel loin
Aizawl FC forward Kamo Stephane Bayi chu match sheet-ah inkhel bul ṭantir tura dah ni mah se warm up-ah naah a khup na a chhuah leh avangin Ivorian forward hi squad aṭanga dah chhuah a ni a, bench-ah player pakhatin an neih tlem phah bawk.

Captain Alfred Kemah Ja­ryan tlar hmaah a mal tlat a, Jayesh Rane leh Amna ten Liberian forward hi thlawpin Kamo thlaktu H. Lalbiakthanga'n tlarhnung a pui thung.

Ignat tel loin
Shillong Lajong coach Thangboi Singto chuan match hmasa pahniha captain atana a hman Dan Gelu Ignat chu inhliam vangin squad-ah a dah lo a, hei vang hian Mizo tlangval Isaac Vanmalsawma chuan armband a hreng.

Mizo pali zingah Isaac leh Zodingliana Tochhawng ten inkhel bul an ṭan a, bench aṭangin Jacob Lalrawngbawla leh Samuel Lalmuanpuia te an lut ve ve bawk. Lajong tana Mizo pali rawn zinte nimin tlai inkhelah an inlan kim.

Penalty vawi 1-na
Shillong Lajong forward Dipanda Dicka-a'n minute lina lekah Ruatthara lakah penalty a hlawh a, Brazilian forward Fabio Pena pet chu AFC keeper Albino Gomes-a'n a dan sak.

Mikhual team an chungnung zui a, Lajong tan Zodingliana chu player pawimawh a ni. Amaherawhchu Armed Veng tlangval Adinga hi minute 30-naah inhliam vangin thlak a ni a, Thangboi Singto hoten ngai an awh tawh lo.

Hei le, AFC
Penalty chawitu Ruatthara'n a tihsual thupha chawi nan goal a khung. Minute 32-naah Hmunhmelṭha tlangval Ruatthara cross chu Alfred-a'n goal-ah chantir thei lo mah se ball per chu AFC defender hian a pet goal chiang hle.

Goal luh hnuah AFC an hmuhnawm sawt a, second half ṭan tirhah erawh goal venhim tumin an khel thung.

Khalid Jamil-a hoten goal venhim hna an thawh lai pawhin goal nawr an bansan lo a, counter attack-ah vawi tam Lajong tlarhnung an rum ṭhaih.

Minute 64-naah Amna thawhrah sengin Rane-a'n AFC tana a goal hmasa ber a khung a, a ball pet ṭha tawk lo chu Lajong defender-in a dang pial lut a ni.

Mualneitu lam tan Rane, Alfred leh H. Lalmuankima'n ten chance ṭha an neih an hlah vek avangin goal dang an khung belh thei lo.

Penalty vawi 2-na
Hun tawp hmain Eze Kings­ley-a'n Japanese mid­fielder Yuta a tihtluk vangin penalty a chawi a, referee-in Lajong chungah ṭhat a chhuah niin a lang.

Lajong midfielder Yuta leh Cameroonian forward Dicka ten penalty pet an inchuh a, penalty hlawhchhuaktu Japanese midfielder a chuh chak zawk.

Aizawl FC midfielder hlui Yuta hian keeper vei lamah a pet a, Goan keeper Albino Gomes-a'n ring dik mah se a dang nawn tawh lo. Mikhual team-in beiseina thar an neih phah bawk.

Hun tawp boruak
Shillong Lajong-in an si phurh sut an tum a, bench aṭanga rawn lut Samuel Lalmuanpuia chu AFC tlarhnung tan player hnawksak a ni. Zemabawk North tlangval hian dinglam aṭangin ball ṭha a lalut a, Lajong forward ten an hmang ṭangkai lo.

Hemi hnu hian substitue Alen Deory freekick hlawh chu Samuel-a bawk hian pet lehin wall a pet per a, season liam taa Aizawl FC lama goal khungtu forward hian a khung nawn thei lo. AFC coach Khalid Jamil-a'n substitution pahnih a la neih chu hun khawhralna atan hmang ṭangkaiin an goal khat neih an hum.

Eng nge an sawi?
Shillong Lajong coach Thangboi Singto chuan, "Penalty chu khung ila, inkhel chu a danglam ngei ang. Amaherawhchu penalty kan hlah avanga chak lo erawh kan ni lo. Goal khung hmasa zawk turin chance dang kan nei a, kan finishing a ṭha tawk lo. Goal khatna kan chhuah danah sawisel tur ka nei lo a, goal hnihna kan chhuah danah erawh kan tlarhnung te an fimkhur tawk lo a ni," tiin point hmuh an phu thu a sawi.

Aizawl FC coach Khalid Jamil chuan, "Chak phu zawk kan ni a, goal dang khung belh thei dinhmunah kan ding zawk a ni. Penalty hmasa zawk kan chawi danah sawisel tur ka nei lo a, pahnihna erawh ka hmuh chian loh avangin engmah ka sawi thei lo. Referee thutluknaah sawisel tur ka nei lo," tiin team ṭha zawk an nih thu a sawi.

Hmabak
Aizawl FC hi January 22-ah Khalid Jamil-a club hlui Mumbai FC hmachhawn turin Mumbai-ah an zin dawn a; Shillong Lajong-in January 21-ah tun season-a an muala match hmasa ber an khel ang a, an khingpui tur chu Minerva Punjab a ni.

Ticket Discount
Aizawl FC chuan chak lawm nan ticket an tihtlawm belh dawn. February 1 hian Mizo club-in DSK Shivajians an mikhual dawn a, inkhel en man hi Rs 50 chauh a ni ang.