Van Gaal a chawl ta
Louis van Gaal chuan coaching a chawlhsan thu a puang. Manchester United manager hlui hian Asian club pakhat a hming tarlan loh hnen aṭanga kum thum chhunga pound maktaduai 44 hlawh tura sawmna a hmuh chu a chhang lo!
Kum 65-a upa Van Gaal hian nikum May thla khan Manchester United chu FA Cup nomawi a chawipui a, hlawhtlinna an chan aṭanga ni hnih hnuah a hna aṭanga ban a ni.
Ajax, Barcelona leh Bayern Munich pawh enkawl tawhtu manager chuan, "Tunah chuan coaching-ah ka lo kir ka ring tawh lo," tiin Thawhṭannia Dutch sorkarin football-a a thawhhlawk vanga lifetime achievement award an hlan hnuah a sawi. Van Gaal hian hian Asia lam aṭanga sum tam tham tak hlawh tura sawmna a hnawl thu a sawi tel bawk.
Van Gaal hi player a nih lai chuan midfielder niin kum 1972 leh 1987 inkar khan Ajax, Royal Antwerp, Telstar, Sparta Rotterdam leh AZ tan te a lo khel tawh a, inkhelh a chawlhsan hnuah team enkawl hna thawk zuiin khawvela manager hlawhtling berte zinga mi a ni.
Van Gaal Sulhnu langsar
National titles : Ajax (1993-94, 1994-95, 1995-96), Barcelona (1997-98, 1998-99), AZ Alkmaar (2008-09), Bayern Munich (2009-10)
Champions League : Ajax (1994-95)
UEF A Cup : Ajax (1991-92)
FA Cup : Manchester United (2015-16)