Chinese Super League Foreign player khel thei zat an titlem

Chinese Football Association chuan tun hnaia Chinese Super League ten khawvel huap player ṭha lakluh nana an sum sen uchuak lutuk venhim nan team pakhata ram pawn mi player awm thei zat chu pathumah an titlem! Chinese FA chuan he thutlukna an siam chhan hi uchuak taka sum luangliam tur ven nan a nih thu an sawi.

CFA-in thuchhuah thar an siam hma hian CSL club tinah ram pawn player "4+1" an awm thei a, pali hi Asia khawmualpui pawn lam mi niin pakhat hi Asian player quota a ni thung. CSL-a team tinte chu an match khelh dawn apiangin squad-ah under 23 player pahnih tal nei tura tih an ni bawk a, kum 23 hnuai lam player pahnih zinga pakhat zawk hian starting XI a chan ngei a ngai bawk. Chinese FA chuan player-in contract a ziah dan bakah dik lo taka thil tih tur awm thei ven nan engkim an enpui tawh tur thu an sawi lang nghal.

Kumin January trans­fer-ah Chelsea midfielder Oscar leh John Mikel Obi te chuan Chinese Super League lam hi an pan der tawh a, Manchester United leh City forward hlui Carlos Tevez chu Shanghai Shenhua chuan khawvela footballer hlawh hnem ber ni turin an thlem lut bawk.

CSL club zingah Shenhua hi a tuar ber tur niin an lang a, tun din­hmunah Tevez, Chelsea forward hlui Demba Ba leh Newcastle striker hlui Obafemi Martins tiamin Chinese ni lo player paruk an nei mek! Hetihlai hian Chelsea forward Diego Costa chu Tianjin Quanjian nen sawi zawm an ni ve reng bawk a, kum khata pound maktaduai 15 hlawh tura Belgium midfielder Axel Witsel sawm chhuaktu club hian Spain international hi kum khatah pound maktaduai 30 hlawhtir an inhuam nia tarlan a ni.