Nadal-a'n bul a ṭan fuh

Australian Open khelh mekah Rafael Nadal chuan nimin khan a match hmasa ber a khel a, first round-ah Florian Mayer chu 6-3, 6-4, 6-4 in a hneh nghal.

Melbourne Park-a inkhelah Grand Slam vawi 14 champion tawh Nadal hian inkhelh chhung zawngin hnufual lai a nei lo. Spain tlangval hian ace vawi ruk siamin double faults a nei lo a, unforced errors erawh ṭum 31 a nei thung.

Kum 30-a upa Nadal chuan, "Inkhel hmasa berah chuan thil hi a awlsam ngai lo. Ka vanneihna chu hun pawimawh taka ka che fuh ṭhin kha a ni, ka khelh danah ka lawm tawk hle," tiin a sawi. Nadal hian Marcos Baghdatis a hmachhawn leh ang.

Nadal hi nikum khan a ban rek na vangin French Open khelh laiin a inhnukdawk a, Wimbledon a khel lo zui bawk. Grand Slam hnuhnung ber US Open-ah beisei a phak loh zui avangin kum 2004 hnua a vawi khat nan season khat chhungin major tournament paliah quarterfinal a lut miah lo - kuminah hian seeded pa­kuana niin hmabak a ngah hle.

Thawhṭanni zan khan Roger Federer chuan first round a lo paltlang ve tawh bawk. Vawi li champion tawh Federer hian a khup hliam zai a nih hnua inelna lian a hmchhawn lehna hmasa berah hian Jurgen Melzer chu 7-5, 3-6, 6-2, 6-2 in a hneh.

Kum 35-a upa Federer hian a match hmasa berah hian a sevice ṭha tak mai a lantir thei nghal a, darkar hnih chhung an inhmachhawn chhung hian vawi 19 ace a siam hman - second round-ah Noah Rubin a hmachhawn ve thung ang.

Grand Slam vawi 17 champion tawh Federer chuan, "Ka tan chuan inkhel zawng zawngah hian hlawkna a awm vek. Nikum kha ka tan chuan hun harsa leh hautak a ni a, tunah pangngai taka tennis ka khel leh thei ta hi ka lawm hle," tiin a sawi.

First round inkhel dangah world number 4 Stan Wawrinka chuan Martin Klizan chu 4-6, 6-4, 7-5, 4-6, 6-4 in a hneh ve bawk.