Bagan chakna Jeje Lalpekhlua

Mohun Bagan tan Jeje Lalpekhlua'n hliam vangin league match hmasa pa­hnih khel lo mah se nimin tlaia Minerva Punjab an mikhualna inkhelah erawh a vawi khat nan inkhel bul a ṭan a, Hnahthial tlangval hian a dam chiang tawh tih lantir nan goal hnih khungin 'Hero of the Match' a thlan nghal a ni.

Rabindra Sarobar Stadium, Kolkata khawpuia inkhelah Bagan tan Jeje-a'n goal hnih a khung bakah Darryl Duffy chuan goal hnih a thawh ve bawk. AIFF player of the year Jeje-a'n Duffy nen ṭha taka ball an inpek hnuah hattrick siamna hun ṭha nei mah se a bawhpelh a, Balwant Singh chuan hun tawp hnaih lama Mizo tlangval ball siamsak ṭha zet chu engmah lo maiah a chantir bawk.

Minerva Punjab coach Surinder Singh-a'n lekha tihfel loh an la neih vanga an match hmasa pahniha a chhawr theih loh nia a sawi Lalrempuia Fanai chuan Punjab club tan inkhel bul ṭanin tun season-a a match hmasa ber a khel a, Lunglei tlangval hian danglamna a thlen thei lo.

Bagan-in an match hmasa pathumah hnehna an la chang vek a, I League club thar Minerva-in hneh an la tawng lo thung.