Plymouth khelmualah chak mamawh Reds

Zanin dar 1:15-ah hian Liverpool chuan FA Cup third round replay khel turin Plymouth Argyle an lenchilh dawn a, mualphona pumpelh turin Jurgen Klopp-a naute tan chak ngei ngei a ṭul.

Anfield-a team pahnih inhma­chhawn hmasakin Reds hi awlsam taka tlang tura ngaih ni mah se Klopp-a'n Liverpool chanchina starting eleven naupang ber a luhtir a, League Two club nen goal khung loa inhnehtawkin replay an khelh a ngaih phah - zaninah an chak zo lo leh a nih ngat chuan Klopp-a'n kawh rawn a hlawh tawh ang.

Reds an chuai?

Liverpool-in duhawm takin season bul ṭan mah se Jurgen Klopp-a naute hian Sunderland an inhnehtawkpui hnuah ngai an awh leh tawh lo a, inelna hrang hrangah match li chhung zet chu a zawnin hneh an tawng tawh lo - tun season a chak hmel an hmuh loh rei ber a ni.

Reds fan-te tana hriat nuam lo em em tur chu match palia hnehna an chan zawh lohna inkhelah hian team lian an hmachhawn chu Manchester United chauh an ni. Liverpool fan-ten chak lawma au an chak leh tawh a, zanin hunṭha hi Klopp-a tan bawhpelh a thiang tawh lo.

United nen an inhnehtawk hnu lawkah German coach hian, "Tun dinhmunah chuan ka player duhzawng apiang ka chhawr theih rih loh avangin kan ṭhat theih dan bera khelh chhuah a harsa a ni. Southampton hneh loh hnu lawka United laka game ropui lantir thei kan ni a, kan khelh ṭhat hi kan chhawm nun zel a ngai a ni," a ti a, zaninah a nauten a thusawi an umzui a ngai dawn.

Tute nge inlan dawn?

Jurgen Klopp-a'n Cup inelnaah league lama a player chhawr tam loh zawk a hmang ṭhin a, Plymouth nena an inkhel hmasak zawka a chetsual chhan erawh hei hi niin a lang. Mahse, German coach hian a thutlukna dik lo pawm duh loin League Two club chuan goal hmaah 'bus' an tlar miau avangin a player senior zawkte pawh inlan se an inhnehtawkpui tho a rin thu a sawi.

Mahse, Reds tan zanin chak leh chak loh hi FA Cup lama an dinhmun hril theitu tur a nih dawn avangin Klopp-a tan player naupang hlir chhawr erawh a fuh tawh lo ang. Reds hian si ban nghak turin Cup lama an chhawr rim Loris Karius bawk an hman beisei a ni a, Manchester United hmachhawn hah lo Daniel Sturridge leh inkhel bul ṭan lotu Philippe Coutinho te chu inkhel bul ṭan tura ngaih an ni.

AFCON khelh vangin Sadio Mane chu inlan lo tur chiang a ni a, Old Trafford inkhelah Jordan Henderson chu lokir tawh mah se English midfielder ai hian Klopp-a'n Lucvas Leiva chu captain armband hreng chunga team a ho tir a nih pawn a mak lo ang.

Plymouth an helhawlh!

Fourth division club Ply­mouth-in rin loh takin khual­mualah Liverpool an chelh a, he result vanga League Two club-in hlawkna an tel ringawt hi pound maktaduai khat a ni - hei hi an club kum khat budget 20% a tling hial.

Plymouth chairman James Brent chuan, "Anfield-a ka inkhel khan United States, China leh India-ah te TV hmanga pek chhuah a nih avangin hlawkna tam tak kan tel a, keini ang club tan chuan hlawkna ropui tak a ni," tiin a sawi a, zaninah khawvel barakhaiha hlawkna tam zawk tel chhunzawm an duh ang.

League Two club hian In­rinni zan khan Reds an mikhual hmaa an match hnuhnung berah Stevenage chu league match-ah 4-2 a hnehin table-ah pahnihna an nih chhunzawm zel a, Plymouth Argyle boss Derek Adams boss chuan, "Anfield-a Liverpool kan draw hnuah khan Liverpool chiah hi tupawhin an sawi a, Stevenage nena kan inkhel tur khan rilru a luah pha lo hrim hrim," tiin Reds mikhual tura an helhawlh thu a sawi.