Bayern-ah Robben a rinawm

Season tawp ruala a contract hmang zo mai tawh tur Arjen Robben chuan Bayern Munich-ah kum 2018 nipui transfer thleng cham turin contract thar a ziak a, kum 34-a upa a nih thlengin Allianz Arena lamah a hun a hmang dawn tihna a ni.

Bayern Munich exe­cutive board chairman Karl-Heinz Rummenigge chuan, "Arjen hi a khelh­naah chuan khawvela player ṭha ber pawl a ni a, kan hnenah kum riat deuhthaw cham tawhin player pawimawh tak a ni thei a ni," tiin contract thar ziaktu winger chu a fak.

Netherlands interna­tional Robben hian kum 2009 khan Real Madrid aṭangin Bayern hi pound maktaduai 24-in a zawm a, a tifuh hle. Chelsea midfielder hlui hian Bayern-a a cham chhungin Bundesliga nomawi panga, German Cup pali, Champions League pakhat, FIFA Club World Cup pakhat, German Super Cup no­mawi pathum leh UEFA Super Cup nomawi pakhat a lo chawi tawh a ni.

Robben hi hliam vangin talbuai ṭhin mah se Bayern tan league match 152 a khelh aṭangin goal 82 tehmeuh a khung a, Champions League-a match 53 a inlan sakah goal 21 a khung thei bawk. Bayern hian an player pawimawh pahnih winger Franck Ribery leh striker Robert Lewandowski te chu contract thar an lo zawrhpui tawh bawk.